काठमाडौं । असोज १० गतेदेखि अग्रीम टिकट बुकिङ खुल्ने भएको छ । आगामी १० गतेदेखि अग्रीम टिकट बुकिङ खुलाउने बिषयमा यातायात व्यवस्था विभाग र सार्वजनिक यातायात केन्द्रीय महासंघबीच शुक्रबार सहमति भएको छ ।
विभागको सभाहलमा भएको दुई पक्षीय छलफलको क्रममा दसैंमा सर्वसाधारणलाई घर जान सहजता प्रदान गर्नका लागि १० गतेदेखि अग्रीम टिकट काट्ने बुकिङ खुला गर्ने सहमति भएको हो । महासंघका अध्यक्ष डोलनाथ खनालकाअनुसार यो विषयमा भने नेपाल यातायात व्यवसायी राष्ट्रिय महासंघले भने सहमति जनाएको छैन ।
यसका लागि आगामी ६ र ७ गते थप छलफल गरि टुँगो लगाइने उनले बताए । सार्वजनिक यातायात केन्द्रीय महासंघमा भने करिब १ सय कम्पनी आवद्ध छन् र एकतिहाइको संख्यामा यात्रुबाहक बस लामो दूरीमा गुड्दै आएका छन् ।
सरकारले आगामी असोजको ९ गतेदेखि सार्वजनिक सवारी साधनको अग्रिम टिकट काट्ने सुविधा खुलाउने विषयमा गृहकार्य सुरु गरेको थियो। करिब २८ लाखभन्दा बढीको संख्यामा सर्वसाधारणले हरेक वर्ष दसैँमा राजधानी छोडेर घर फर्किन्छन् । तर पछिल्लो पटकको दसैँको समयमा कोभिडको चरम महामारी फैलिनुअघि नै अधिकांश सर्वसाधारण राजधानी छाडिसकेका थिए ।
गत् वर्ष अग्रिम टिकट काट्ने सुविधा नखुल्दा यात्रुहरु निक्कै कठिनाईका साथ दसैँ मान्न सर्वसाधारण राजधानीबाट फर्किएका थिए । दसैँको समयमा बसको टिकटमा निक्कै ठगी हुने भएकाले सरकारले यातायात व्यवसायीको सहकार्यमा वर्षेनी दसैँको मुखमा अग्रिम टिकट काट्ने सुविधा खुलाउँदै आएको छ ।