काठमाडाैं । भारतको दक्षिणी राज्य केरलामा लगातार वर्षा र बाढीका कारण कम्तीमा २७ जनाको मृत्यु भएको छ । बाढीमा ८ जना बेपत्ता भएका छन् ।  

भारतीय सञ्चारमाध्यमका अनुसार मृतकमा पाँच जना बालबालिका पनि छन् । मृतकको संख्या बढ्न सक्ने आशंका गरिएको छ । भारी वर्षाका कारण आएको बाढीले गाउँ र सहर छिन्नभिन्न पारेकाे भारतीय सञ्चारमाध्यमले जनाएका छन् । 

बाढीका कारण कतिपय स्थानीय सडकहरु पनि अवरुद्ध भएका छन् । मौसम विज्ञान विभागका अधिकारीहरुले अझ वर्षा हुनसक्ने बताएका छन् । वर्षाका कारण कतिपय सडकमा आवागमन बन्द रहेको बताइएको छ ।