मोगादिसु, रासस । अफ्रिकी मुलुक सोमालियाको एबोरे क्षेत्रमा गरिएको कारवाहीका क्रममा इस्लामिक लडाकु संगठन अल शबाबका ४३ लडाकु मारिएका छन् ।

सोमाली सेनाको कारवाहीका क्रममा उनीहरुको मृत्यु भएको अन्तर्राष्ट्रिय सञ्चारमाध्यमले जनाएका छन् । अल शबाबका लडाकुहरुले उक्त क्षेत्रमा केही समय यतादेखि हिंसा मच्चाइरहेको सूचनाका आधारमा सेनाले हवाई कारवाही गरेको हो ।

उक्त कारवाहीका क्रममा शनिबार राति ती लडाकु मारिएको सोमाली राष्ट्रिय रेडियो, एसएनए रेडियोले जनाएको छ ।

एबोरे क्षेत्रको बुला बार्ता जिल्लामा अल–शबाबका लडाकुहरुले आश्रय लिएर तालिम केन्द्र सञ्चालन गरेको सूचना त्यहाँका सूचना मन्त्रालयले प्राप्त गरेको जनाइएको छ ।

सोही सूचनाका आधारमा सेनाले हवाई आक्रमण गरी कारवाही थालेको र शनिबार रातिको सो कारबाहीका क्रममा ती लडाकु मारिएको बताइएको छ ।

त्यस कारवाहीका क्रममा उनीहरुको आश्रयस्थल नष्ट भएको र केही लडाकु घाइते भएका पनि बताइएको छ । सोमाली सरकारले आतङ्ककारी घोषणा गरेको अल शबाब समूहका विरुद्धमा सेनाले केही हप्तादेखि प्रतिरक्षात्मक कारवाहीलाई जारी राखेको छ ।

सो कारवाहीमा केही सामुदायिक समूहको पनि संलग्नता रहेको पनि सेनाले जनाएको छ । एबोरे क्षेत्रमा अल शबाबले आफ्नो तालिम केन्द्र सञ्चालनमा ल्याएको बताइएको छ । सो क्षेत्रमा उनीहरुको बढी मात्रामा प्रभाव रहेकाले सरकारले यस क्षेत्रमा हमला गर्ने गरेको बताइएको छ ।