काठमाडौं । नेपाली कांग्रेसका केन्द्रीय सदस्य रामहरि खतिवडाले ओखलढुंगामा १२ हजार मतान्तरले चुनाव जित्ने दावी गरेका छन् । चुनावी प्रचार भेला र कार्यकर्तासँगको आन्तरिक परामर्शपछि खतिवडाले यसपटक आफुले १२ हजार बढी भोट ल्याएर चुनाव जित्ने दावी गरेका हुन् ।

नेपाली कांग्रेस एक भएको र गठबन्धन दलको मत समेत जोड्दा आफ्नो जितलाई कसैले रोक्न नसक्ने खतिवडाको तर्क छ । ‘विगत जस्तो कांग्रेसभित्र मनमुटाव छैन । हामीलाई गठबन्धन दलको पनि साथ छ ।’ खतिवडाले भने ।

‘मैले ५ वर्षअघि ५ हजार हाराहारि भोटले हारेँ यो पटक दुवै प्रादेशिक निर्वाचन क्षेत्रबाट ६÷६ हजार मतान्तर हुन्छ । १२ हजार भन्दा बढी भोटले चुनाव सजिलै जित्छु ।’ उनले भने । २०७४ सालमा निर्वाचित सांसदले जनताको पक्षमा र जिल्लाको विकासमा काम गर्न नसकेको बताउँदै आफुले जनताको दुःख नजिकबाट नियालेकाले सहज जित निकाल्ने दाबी गरे ।

गत बैशाखमा सम्पन्न स्थानीय तह निर्वाचनमा कांग्रेस र माओवादीले पाएको मत विश्लेषणका आधारमा खतिवडा चुनाव जित्नेमा ढुक्क छन् ।

ओखलढुङगामा उम्मेदवार धेरै भएपनि मुख्य प्रतिस्पर्धी एमालेका यज्ञराज सुनुवार र कांग्रेसका रामहरि खतिवडा नै हुन् ।