बुटवल । मंसिर ४ गते सम्पन्न प्रतिनिधि सभा र प्रदेश सभा निर्वाचनमा गुल्मीमा ७ हजारभन्दा बढी मत बदर भएको छ ।
जिल्ला निर्वाचन कार्यालय गुल्मीले दिएको जानकारी अनुसार दुई निर्वाचन क्षेत्र रहेको गुल्मीमा प्रतिनिधि सभा र प्रदेश सभाको प्रत्यक्ष तर्फ ७ हजार ६१ मत बदर भएको हो ।

क्षेत्र नम्बर १ मा प्रतिनिधि सभातर्फ १८२५ र प्रदेश सभातर्फ १६५९ मत बदर भएको छ । त्यस्तै क्षेत्र नम्बर २ मा प्रतिनिधि सभातर्फ १८९३ र प्रदेश सभातर्फ १६८४ मत बदर भएको जिल्ला निर्वाचन कार्यालय गुल्मीका सूचना अधिकारी मेघलाल पाण्डेले जानकारी दिए ।

जिल्लामा २ लाख २३ हजार ६१५ मतदाता मध्ये १ लाख २८ हजार ९७५ जनाले मतदान गरेका थिए । दलहरु गठबन्धन गरेर जानु र गाउँगाउँमा मतदाता शिक्षा नपुग्नुले जिल्लामा धेरै संख्यामा मत बदर भएको अनुमान छ । जिल्लामा स्वास्थ्य स्वयंसेविकाबाट मतदाता शिक्षा दिइए पनि प्रभावकारी नभएको गुनासो छ ।

यसपटकको निर्वाचनमा मतदान केन्द्रमा खटिएका मतदान अधिकृतले नै प्रतिनिधि सभाको मतपत्र दिने ठाउँमा प्रदेश सभाको मतपत्र दिने जस्ता त्रुटीले मतदानमा समस्या उत्पन्न समेत भएको थियो । एउटा केन्द्रमा पुनःमतदान गर्नुपर्ने अवस्था सृजना भएको थियो ।