काठमाडौं । विमानस्थलबाट अवैध रुपमा भित्र्याइएपछि समातिएको १०० किलो सुन गालेको प्रत्यक्ष प्रसारण गरिने भएको छ ।

राजस्व अनुसन्धान विभाग स्रोतका अनुसार स्कुटरको ‘ब्रेक शु’मा लुकाई छिपाई सुन ‘ब्रेक शु’ बाट छुट्याएर यकिन गर्दाको प्रक्रिया सर्वसाधारणलाई प्रत्यक्ष प्रसारण मार्फत जानकारी दिन लागिएको हो ।

अहिलेसम्मकै ठूलो सुन तस्करी धन्दा कसरी भयो र सुन लुकाउनका लागि के–केसम्म भयो भन्ने जानकारी दिने हिसाबले प्रत्यक्ष प्रसारण गर्न लागिएको विभागको दाबी छ ।

टेलिभिजनबाट प्रत्यक्ष प्रसारण गर्दाको प्रक्रिया र सुरक्षाबारे नेपाल राष्ट्र बैंकको टक्सार विभागसँग राजस्वले छलफल समेत गरीसकेको बताइएको छ ।

‘ब्रेक शु’बाट सुन छुट्याउने प्रक्रियाको प्रत्यक्ष प्रसारणका लागि राजस्वबाट प्रस्ताव आएको टक्सार विभाग स्रोतले जनाएको छ ।

‘सुरक्षाको उपाय अवलम्बन गर्दै सरकारी टेलिभिजनबाट प्रत्यक्ष प्रसारण गर्ने गरी छलफल भएको छ’, स्रोतले बतायो ।

यस सम्बन्धमा विभागले प्रधानमन्त्रीसँग छलफल गर्नुपर्ने भएकाले निर्णय भने शुक्रबार प्रधानमन्त्री नेपाल फर्किएपछि मात्रै गर्ने तयारी गरिएको जनाइएको छ । प्रधानमन्त्री फर्किए पछि मात्रै सुन गाल्ने गरी तयारी दुवै विभागले गरिरहेका छन् ।

सुन गाल्नका लागि राजस्व अनुसन्धन, भन्सार विभाग, राष्ट्र बैंक आन्तरिक लेखा परीक्षण विभाग, टक्सार लगायत ८ देखि १४ जना अधिकारीको प्रत्यक्ष निगरानीमा हुनेछ ।

‘ब्रेक शु’बाट सुन छुट्ट्याउन एक दिन लाग्ने र गुणस्तर जाँचका लागि थप केही घण्टा लाग्न सक्ने राष्ट्र बैंकले बताएको छ ।

विभागले विमानस्थल भन्सारको हाताबाट २ साउनको साँझ ५ बजे सुनसहित २ जनालाई नियन्त्रणमा लिएको थियो ।

हङकङबाट नेपाल ल्याइएको तस्करीको सुन प्रकरणमा हिजो (बुधबार) बेलुकासम्म राजस्व अनुसन्धान विभागले चिनियाँ र भारतीय १/१ जना नागरिक सहित १७ जनालाई हिरासतमा लिइसकेको छ । जाँचपासमा जोडिएका ३ जना भन्सार विभागका कर्मचारी समेतलाई नियन्त्रणमा लिइएको छ ।