काठमाडौं । नेपाली काँग्रेसका सांसद डा.चन्द्रकान्त भण्डारीले अनियमितता गर्नेहरुको बिरुद्धमा सबै एक भएर लड्नुपर्ने बताएका छन् ।

मंगलवार संसद भवन परिसरमा सञ्चारकर्मीहरुसँग कुरा गर्दै उनले यस्तो बताएका हुन् । उनले पछिल्लो सुन तस्करीबारे पहिला प्रहरी प्रशासन, राज्यका निकायहरुलाई छानबिन गर्न दिनुपर्ने बताए ।

उनले राज्यका निकायले निष्पक्ष छानबिन गर्न नसके र निचोडमा पुग्न नसके मात्रै उच्चस्तरीय छानबिन समिति बनाएर अनुसन्धान गर्न उपयुक्त हुने बताए । उनले अनियमितता गर्नेहरुले नेपाललाई नांगो बनाइरहेको भन्दै सबै एक भएर त्यसबिरुद्ध लड्नुपर्ने बताए ।

उनले भने, ‘उच्चस्तरीय छानबिन समिति बनाउनु हुँदैन भन्ने होइन । बनाएपनि हुन्छ । तर, राज्यको निकाय छ । पुलिस छ । राजश्व छ । उनीहरुले गर्ने कुरा एक छिन हेरौं । उनीहरु टार्गेटमा पुग्न सकेनन् । माफियाको घरसम्म पुग्न सकेनन् भने उच्च स्तरीय छानबिन कमिटी बनाएर पनि छानबिन गर्नुपर्छ । त्यसलाई गर्नुहुँदैन भन्ने कुरामा हामी जान हुन्न । जसरी हुन्छ–यो माफियाहरुलाई, नेपाली युवाहरु, जसलाई विदेश जान बाध्य बनाईराखेका छन् । नेपाललाई नांगो बनाईरहेका छन् । त्यसको बिरुद्धमा न काँग्रेस, न कम्युनिष्ट हामी सिंगो नेपाली भएर लड्नुपर्छ । यत्ति कुरा हो । त्यो भन्दा हामीसँग अरु विकल्प छैन ।’

सांसद भण्डारीले भ्रष्टाचारीहरुको बिरुद्धमा सबै एक भएर लड्नुको विकल्प नरहेको जिकिर गरे ।