डडेल्धुरा । सुदूरपश्चिम प्रदेशको पहाडी जिल्ला डडेल्धुरामा रोपाइँको खाना खाँदा एकै गाउँका २० जनाभन्दा बढी बिरामी परेका छन् ।
रोपाइँको खाना खाएकै कारण जिल्लाको परशुराम नगरपालिका–४ कटालका २० जनाभन्दा बढी स्थानीय एकै साथ बिरामी परेका जोगबुडा अस्पतालका सूचना अधिकारी जयबहादुर धामीले जानकारी दिए ।
उनका अनुसार बिहीबार गाउँमा रोपाइँ गर्न गएका मानिसहरुले खाना खाँदा सबै बिरामी परेका हुन् । रोपाइँमा गएका सबैजसो मानिसलाई झाडापखला र वान्ता हुने समस्या देखा परेको उनले बताए ।
बिरामी परेका २० मध्य ७ जनालाई थप उपचारका लागि कैलालीको धनगढी रिफर गरिएको सूचना अधिकारी धामीले जानकारी दिए ।
बाँकीको जोगबुडा अस्पतालमा उपचार जारी छ । उनीहरुलाई फुड पोइजन भएको हुनसक्ने बताइएको छ । ल्याव टेस्ट रिपोर्ट आउन बाँकी छ ।