काठमाडौ । कञ्चनपुरको भीमदत्त नगरपालिकामा नेपाली काँग्रेस विजयी भएको छ । काँग्रेसका उम्मेदवार पदम बोगटी मेयरमा र निलम लेखक (जोशी) उपमेयरमा निर्वाचित भएका हुन् । बोगटीले १५ हजार ८ सय ८२ मत प्राप्त गरे भने उनका निकटतम प्रतिद्वन्द्वी एमालेका महेशप्रसाद पन्तले ८ हजार १ सय ४९ मत पाएका छन् ।

राप्रपाका गजेन्द्रबहादुर चन्दले ७ हजार १ सय ५ ल्याउँदा नेकपा एकीकृत समाजवादीका राजेन्द्र पाण्डेयले ३ हजार ४५२ मत पाएका छन् ।

यस्तै उपमेयरमा निर्वाचित जोशीले १२ हजार २ सय १६ मत ल्याउँदा उनका निकटतम प्रतिद्वन्द्वी माओवादी केन्द्रका कृष्णदत्त जोशीले १० हजार ५ सय ९६ मत पाए । एमालेकी भुवन कुँवरले ७ हजार ९ सय ९० मत पाइन् । गत चुनावमा मेयर जितेको एमालेले यसपटक गुमाएको छ ।

भीमदत्तमा काँग्रेस र एमालेले एक्ला एक्लै प्रतिस्पर्धामा उत्रिएका थिए भने माओवादी र एकीकृत समाजवादीबीच तालमेल भएको थियो । काँग्रेस नेता रमेश लेखकको निर्वाचन क्षेत्र नम्बर ३ मा पर्ने भीमदत्तमा काँग्रेसकै बोगटीले बाजी मारेका छन् ।