काठमाडौं । नेपाल क्रिकेट संघ (क्यान) ले पुरुष र महिला राष्ट्रिय क्रिकेट टोलीका खेलाडीको पारिश्रमिक वृद्धि गरेको छ । मंगलबार क्यान कार्यसमितिको बैठकले गरेको निर्णयअनुसार पुरुष राष्ट्रिय टोलीमा रहेका तीनै ग्रेडका खेलाडीको पारिश्रमिक मासिक १० हजारका दरले वृद्धि गरेको छ ।

पुरुष क्रिकेटरको मासिक १० हजारका दरले तलव वृद्धि गर्दा क्यानले महिला क्रिकेटरको भने ६ हजार मात्रै वृद्धि गरेको छ ।

यो सँगै क्यानले नेपाली पुरुष क्रिकेट टोलीका ए ग्रेडका खेलाडीको पारिश्रमिक ६० हजार पर्याएको छ । बी र सी ग्रेडका खेलाडीले क्रमसः ५० र ४० हजार रुपैयाँ पाउँछन् । यसअघि सन् २०१७ देखि क्यानले राष्ट्रिय टोलीका खेलाडीलाई तीन समूहमा वर्गीकरण गरी केन्द्रीय अनुबन्धनको व्यवस्था सुरु गरेको थियो । सुरुमा ए बी र सी ग्रेडका खेलाडीले क्रमस ः २५, १५ र १० हजार पारिश्रमिक दिइएको थियो ।

क्यानले महिला क्रिकटरको पनि पारिश्रमिक बढाएको छ । तर पुरुष क्रिकेटरको तुलनामा महिला क्रिकेटरको वृद्धि अनुपात भने कम छ । क्यानले पुरुष क्रिकेटरको ए ग्रेडका खेलाडीको १० हजारका दरले तलव वृद्धि गर्दा महिला समुहमा ए र बी ग्रेडका खेलाडीको पारिश्रमिक मासिक ६ हजारका दरले मात्रै वृद्धि गरेको छ । सी ग्रेडका खेलाडीको ५ हजारका दरले बढाएको छ ।

नयाँ पारिश्रमिकअनुसार ए ग्रेडका महिला खेलाडीले मासिक २१ हजार, बी र सी ग्रेडका खेलाडीले क्रमसः १८ र १५ हजार रुपैयाँ पारिश्रमिक पाउँछन् ।