काठमाडौं । बलिउडका दुई चलचित्रहरुको सेटमा आगलागी हुँदा एक जनाको मृत्‍यु भएको छ । भारतीय संचार माध्यमहरुका अनुसार लभ रन्जनद्वारा निर्देशित रणवीर कपुर तथा श्रद्दा कपुर अभिनित चलचित्र र राजश्री प्रोडक्सनको ब्यानरमा निर्माणाधिन चलचित्रहरुको सेटमा आगलागी भएको हो ।

आगलागीमा परी ३२ वर्षिय कर्मचारी मनिस देवासीको मृत्‍यु भएको छ भने अर्का एकजना कर्मचारी गम्भिर घाइते भएका छन् । चित्रकुट मैदान पश्चिम अन्धेरीको सेटमा शुक्रबार भएको आगलागी नियन्त्रण गर्न ५ घण्टाभन्दा बढी समय लागेको मिडिया रिपोर्टमा उल्लेख छ ।

घटनामा परी ज्यान गुमाएका कर्मचारीले लभ रन्जनको सेटमा लाइटिङ्गको काम गर्ने गरेको पश्चिमी भारत सिने कर्मचारी महासंघका महासचिव अशोक दुबेले भारतिय संचार माध्यमहरुलाई जानाकारी गराएका छन् ।

आगलागीको कारण भने हालसम्म पत्ता लागिसकेको छैन । लव रन्जनको फिल्मबाट अभिनयमा डेब्यु गर्न लागेका फिल्म निर्माता बोनी कपूरले शुक्रबार बम्बे टाइम्ससँग आगलागी हुँदा सेटमा लाइटिङ्गको काम मात्र भइरहेको र शनिबारबाट छायांकन सुरु गर्ने अपेक्षा गरिएको जनाएका छन् ।

राजश्री प्रोडक्सनको फिल्मबाट बलिउडमा डेब्यू गर्ने तयारी गरिरहेका धर्मेन्द्रका नाति र सनी देओलका कान्छो छोरा राजवीर देओल पनि आगलागीको समयमा फ्लिमकै सेटमा रहेको बताइएको छ ।