काठमाडौं । नेपाली काँग्रेसकी सांसद रंगमती शाहीले कर्णाली करिडोर अन्तर्गतको सलीसल्लामा बेलिब्रिज बनाउन सरकारको ध्यानाकर्षण गराएकी छन् । आईतवार प्रतिनिधि सभा बैठकको विशेष समयमा बोल्दै सांसद शाहीले कर्णाली करिडोर अन्तर्गत सलीसल्लामा बेलिब्रिज बनाउन आफुले ३ वर्षदेखि सरकारको ध्यानाकर्षण गराएको भएपनि हालसम्म बन्न नसकेको बताइन् ।

उनले सरकारको निकायहरुले एकले अर्कोलाई काम लगाएर पन्छिने गरेको बताइन् । सांसद शाहीले जुम्लाका जनताहरुले एम्बुलेन्स चढ्न नपाउन् र बाँदर हिड्ने बाटोमै हिडुन् भन्ने सरकारले उद्देश्य राखेको जिकिर गरिन् ।

उनले भनिन् – ‘कर्णाली करिडोरको सलीसल्ला भन्ने ठाउँमा एउटा बेलिब्रिज बनाउनका लागि ३ वर्ष म सिंहदरबार धाउँदा धाउँदा हरेक नियम, कानून लागू हुन थाले । आज बाटै नभएको ठाउँमा पुलहरु बनेका छन् । त्यसमा नियम, कानून केहीपनि लाग्दैन रे । एउटा हुम्ली जनताले एम्बुलेन्स चढ्न पाउँ । गाडी चढेर मेरो उपचार काठमाडौंका राम्रा अस्पतालमा उपचार होस् भन्नका लागि आज हुम्ली जनतामाथि, हुम्लाको विकास निर्माणका लागि आज हरेक नियम, कानून लगाइन्छ । मन्त्रीले सचिवलाई, सचिवले डिजीलाई, डिजीले आयोजना प्रमुखलाई अह्राउनुहुन्छ । आयोजना प्रमुखले पुच्छर हल्लाउँदै बसेका छन् । हुम्ली जनताले अझैपनि बाँदर हिँड्ने बाटोमै हिँडुन् भन्ने सरकारको उद्देश्य त्यही हो ।’

उनले हुम्लामा हालसम्म सडक सञ्जाल नजोडिएको, आंगिक क्याम्पस नभएको, विद्युतको राष्ट्रिय प्रशारण लाइन नपुगेको र सञ्चारको पहुँच नभएको पनि बताइन् ।