काठमाडौँ  – चिकित्सा विज्ञान राष्ट्रिय प्रतिष्ठान (न्याम्स) मा कार्यरत आवासीय चिकित्सकहरुले निर्वाह भत्ता उपलब्ध गराउन माग गरेका छन् । आवासीय चिकित्सकहरुको संस्था रेजिडेन्ट एशोसिएशन अफ न्याम्स (र्यानले) ले  विज्ञप्ति जारी गर्दै भत्ता नपाएको विषयमा सरोकारवालाहरुको ध्यानाकर्षण गराएका हुन् ।

अध्यक्ष डा शेषराज घिमिरे र महासचिव डा पुष्पराज ज्ञवालीले मंगलबार विज्ञप्ति जारी विगत दुई महिनादेखि निर्वाह भत्ता नपाउँदा दैनिक जीवनयापनमा कठिनाई भएको र त्यसले सेवा प्रवाह गर्ने मनोबलमा प्रत्यक्ष असर पारेको विज्ञप्तिमा उल्लेख छ । सम्बन्धित निकायहरुमा बारम्बार अनुरोध गर्दासमेत सकारात्मक प्रतिफल नआएको भन्दै र्यानले प्रतिष्ठान, चिकित्सा शिक्षा आयोग, स्वास्थ्य तथा जनसंख्या मन्त्रालय, अर्थ मन्त्रालय र नेपाल चिकित्सक आयोगलाई भत्ताका लागि पहल गरिदिन आग्रह गरेको हो ।

आवासीय चिकित्सकहरुले अध्ययन तथा प्रयोगात्मक अवधिभर अन्य कुनै पनि संस्थामा काम गर्न नपाउने प्रावधान छ ।