काठमाडौं । नेपाली चलचित्र ‘परस्त्री’ आज (बिहीवार) बाट प्रदर्शनमा आएको छ । चलचित्र आजबाट नेपाल र भारतका विभिन्न चलचित्र हलहरुमा प्रदर्शनमा आएको हो ।

चलचित्रमा कोशिस क्षत्री, शिल्पा मास्के, गौरव बिष्ट, एलिसा क्षत्री, अशान्त शर्मा, गीत बिष्ट, रामबाबु रेग्मी, सरस्वती अधिकारी, अर्पित न्यौपाने लगायतले अभिनय गरेका छन् । चलचित्र निर्देशक दीपेन्द्रकुमार खनालले लेखेका छन् ।

बुधवार साँझ काठमाडौंमा भएको चलचित्रको प्रिमियर शोमा पुगेका कलाकारहरुले चलचित्र राम्रो रहेकाले सबैले हेरेर साथ दिन आग्रह गरे । प्रिमियर शोमा पुगेका निर्देशक, लेखक एवं अभिनेता खगेन्द्र लामिछानेले चलचित्रमा अब के होला भन्ने कौतुहलता रहेको बताए ।

उनले भारतमा पनि यो चलचित्र प्रदर्शन भइरहेको भन्दै भारतका दर्शकले पनि चलचित्र हेरेर रुचाउने बताए । त्यस्तै, अभिनेत्री स्वस्तिमा खड्काले भारतमा नेपाली चलचित्रको ऐना यस फिल्मले देखाउने बताइन् ।

प्रिमियर शोपछि बोल्दै निर्देशक एवं यस चलचित्रका लेखक दीपेन्द्र के. खनालले यस चलचित्र क्राइम जनरामा नेपालमा बनेको सशक्त फिल्म भएको दाबी गरे ।

चलचित्र सर्मिला पाण्डेले निर्माण गरेकी हुन् ।