काठमाडौं । पाँच लाख ऋण दिई ६५ लाखको तमसुक बनाएर एक महिलाको घरजग्गा कब्जा गरी पटक–पटक बलात्कार गरेको अभियोगमा पक्राउ परेका सुर्जमान मालीविरुद्ध किटानी जाहेरी दिइएको छ ।

ललितपुर प्रहरी प्रमुख एसएसपी सिद्धिविक्रम शाहले जिल्ला प्रहरी परिसर, ललितपुरमा पुगेर पीडितले मालीविरुद्ध मानवबेचबिखन तथा ओसारपसार ऐन, २०६४ विरुद्धको कसुरमा किटानी जाहेरी दर्ता भएको जानकारी दिए ।

पीडितले मालीसँगै धापाखेलका उमेश शाहीविरुद्ध पनि जाहेरी दिएकी छन् । पीडितका अनुसार, उनी २०७५ सालको अन्तिमदेखि ०७६ साउनसम्म पटक–पटक बलात्कारमा परेकी थिइन् ।

मालीले सुरुमा आफूले बलात्कार गरेको त्यसपछि अन्य व्यक्तिलाई भेट्न पठाएर समेत जबरजस्ती करणी गराएको पीडितको आरोप छ । तर, जबरजस्ती करणीको कसूरमा अनुसन्धानका लागि हदम्याद नाघिसकेको भन्दै मानवबेचबिखनविरुद्धको कसुरमा मात्रै जाहेरी दिइएको हो ।

‘तत्काललाई अनुसन्धान गर्दै जानका लागि मानवबेचबिखन सम्बन्धी कसुरमा जाहेरी लिएका छौं, अनुसन्धानका क्रममा थप खुले अनुसार गर्छौं ।’ एसएसपी शाहले भने ।

मालीमाथि थप अनुसन्धानका लागि जिल्ला अदालत, ललितपुर उपस्थित गराई हिजो (आइतबार) थुनामा लिएर अनुमति लिने तयारी छ । यस घटनाकी पीडितले शुक्रबार गृहमन्त्री नारायणकाजी श्रेष्ठलाई पनि भेटेकी थिइन् । लगत्तै ललितपुर प्रहरीको टोलीले उनलाई नियन्त्रणमा लिएको थियो ।

उक्त घटनामा अरु व्यक्तिको संलग्नता सम्बन्धमा पनि अनुसन्धान सुरु भएको प्रहरी स्रोतले बताएको छ ।