हेटौंडा । मकवानपुरको बागमती गाउँपालिका–५ सिक्रे दोभानमा मंगलबार बिहान गएको पहिरोले घर बगाउँदा एक जनाको मृत्यु भएको छ भने ६ जना पहिरोमा परि बेपत्ता भएका छन् ।

हिजो (सोमबार) देखि परेको अविरल वर्षाका कारण मंगलबार बिहान ४ बजे बागमती गाउँपालिका–५ सिक्रे दोभानस्थित अक्कल बहादुर स्याङ्तानको घर पहिरोले बगाएको हो ।

पहिरोमा परी घाइते भएकी अक्कल बहादुरको श्रीमती ५५ वर्षीय सन्तमायालाई स्थानीयले उद्धार गरी स्थानीय मेडिकलमा लगेकोमा उपचारको क्रममा उनको बिहान साँढे ८ बजे ज्यान गएको जिल्ला प्रहरी कार्यालय मकवानपुरले जनाएको छ ।

उक्त पहिरोमा परि सिक्रे दोभान बस्ने ६० वर्षीया अक्कल बहादुर स्याङ्तान, उनकी २२ वर्षीया छोरी शिला पहरी, २५ वर्षीय ज्वाँई जीवन पहरी, जीवनका ४ वर्षीय छोरा मिलन पहरी र डेढ वर्षीया छोरी दिब्या पहरी बेपत्ता भएका छन् ।

भोर्लेनी प्रहरी चौकी मकवानपुरका अनुसार अक्कलको घरमा पाहुनाका रुपमा गएका सिन्धुली जिल्ला हरिहरपुर गाउँपालिका १ को कटी बस्ने अन्दाजी १७ वर्षीय पासाङ घिसिङ पनि बेपत्ता भएका छन् । बेपत्ताहरुको खोजी कार्य जारी रहेको प्रहरीले जानकारी दिएको छ ।