काठमाडौं । चौधरी ग्रुपको बहुमत स्वामित्व रहेको चारतारे भिभान्ता काठमाडौं होटलको व्यापार ४४ प्रतिशत बढेको छ । गत वर्ष भिभान्ताले ३३ करोड २० लाख रुपैयाँ व्यापार गरेको छ । अघिल्लो वर्ष भिभान्ताले २३ करोड रुपैयाँ व्यापार गरेको थियो । एक वर्षमा भिभान्ताको व्यापार १० करोड रुपैयाँ बढेको सार्वजनिक गरेको वित्तीय विवरणमा उल्लेख छ ।

सन् २०२१ मा होटलको व्यापार खुम्चिएर ९ करोड रुपैयाँमा झरेको थियो । यस्तै २०२० मा १७ करोड ६० लाख रुपैयाँ व्यापार गरेको थियो । कोभिड महामारीका कारण २०२१ मा भिभान्ताको आम्दानीमा भारी गिरावट आएको हो ।

यस्तै सञ्चालनको पहिलो वर्ष होटलले ८ करोड १४ लाख रुपैयाँको कारोबार गरेको थियो ।

होटलले ८३ करोड रुपैयाँ ऋणको रेटिङ गराएको छ ।

आर एन्ड आर होटल एन्ड रिसोर्टले सञ्चालनमा ल्याएको भिभान्ता काठमाडौंको स्थापना सन २०१४ मा भएको हो । होटल सन २०१९ को जनवरीदेखि सञ्चालनमा आएको हो।

होटल सञ्चालनमा आएको केही महिनामा कोरोना महामारी फैलिएपछि भएको बन्दाबन्दी (लकडाउन) को मारमा परेको थियो । इन्डियन होटल कम्पनी लिमिटेड (आईसीएचएल) ले भिभान्ताको व्यवस्थापन सम्हालेको छ ।

काठमाडौं उपत्यकाको ललितपुरमा अवस्थित छ । यो सुविधाजनक रूपमा धेरै कर्पोरेट कार्यालय र विदेशी मिसन कार्यालयहरूको नजिक अवस्थित छ ।

आर एन्ड आर कम्पनीमा चौधरी ग्रुपको सिजी होल्डिङस र आइजे ग्रुपको सिविक्रम ल्यान्ड एन्ड इन्डष्ट्रियल कम्पनीको लगानी छ ।

होटलमा उद्योगपति विनोद चौधरीको ७५ र बाँकी आइजे ग्रुपका अध्यक्ष रविभक्त श्रेष्ठको २५ प्रतिशत स्वामित्व छ । होटलको ६५ प्रतिशत बैंकको ऋण र बाँकी ३५ प्रतिशत संस्थापकहरुको स्वपुँजी लगानी रहेको छ ।

यस्तै आइजे र चौधरीको संयुक्त लगानीमा ललितपुर कुपन्डोल हाइटमा पाँचतारे होटलसहित अत्याधुनिक लक्जरी अपार्टमेन्ट निर्माण भइरहेको छ ।

पुरानो चारतारे होटल समिट भत्काएर अत्याधुनिक पाँचतारे होटलसहित भव्य लक्जरी अपार्टमेन्ट निर्माण सुरु भएको हो।

पहिलो चरणमा अपार्टमेन्ट निर्माण सुरु हुनेछ । ६ अर्ब रुपैयाँ लागत अनुमान गरिएको उक्त परियोजना आगामी सन् २०२६ मा पूरा हुने छ ।