काठमाडौं । क्रेस्ट माइक्रो लाइफ इन्स्योरेन्स लिमिटेडले प्राथमिक सेयर (आइपिओ) निष्कासन गर्ने भएको छ । क्रेस्ट माइक्रो लाइफ इन्स्योरेन्स आइपिओ निष्कासन गर्ने पहिलो लघु जीवन बिमा कम्पनी भएको छ ।

कम्पनीले जारी पुँजीको ३० प्रतिशतले हुन आउने २२ करोड ५० लाख रुपैयाँ बराबरको २२ लाख ५० हजार कित्ता आइपिओ निष्कासन गर्न लागेको हो । सेयरको अंकित मूल्य १०० रुपैयाँ छ । आइपिओ निष्काशन गर्न क्रेस्ट माइक्रोले निष्काशन तथा बिक्री प्रबन्धकमा एनआइएमबी एस क्यापिटल लिमिटेडलाई नियुक्त गरेको छ

न्यून आय भएका एवम पिछडिएका क्षेत्रका वासिन्दा र सीमान्तकृत समुदायका व्यक्तिहरुलाई लघुजीवन बिमा सेवा पुर्याउने लक्ष्य लिई क्रेस्ट माइक्रो लाइफ इन्स्योरेन्सले २०८० जेठ ८ गते लघु जीवन बिमा व्यवसाय गर्न नेपाल बिमा प्राधिकरणबाट इजाजत पाएको थियो । कम्पनीमा संयुक्त लगानीकर्ताहरुमा नेपाली प्रतिष्ठित व्यवसायी समूहहरुको संस्थापक लगानी ७० प्रतिशत छ । सर्वसाधारण लगानीकर्ताहरुको लगानी ३० प्रतिशत स्वामित्व रहनेछ ।

सम्झौतापत्रमा निष्काशन कम्पनीका तर्फबाट प्रमुख कार्यकारी अधिकृत (सिइओ) प्रतापमान श्रेष्ठ र निष्काशन तथा बिक्री प्रबन्धकका तर्फबाट सिइओ शिवान्तबहादुर पाँडेले हस्ताक्षर गरेका छन् ।