logo

२०८१ जेष्ठ १५ मंगलबार

logo
  • मंगलबार, १५ जेष्ठ २०८१
  • ‘प्रथम कर्णाली हाफ म्याराथन’को उपाधि रावत र भण्डारीलाई

    ‘प्रथम कर्णाली हाफ म्याराथन’को उपाधि रावत र भण्डारीलाई

    923
    Shares
    ‘प्रथम कर्णाली हाफ म्याराथन’को उपाधि रावत र भण्डारीलाई

    कर्णाली । कर्णाली प्रदेशको राजधानी सुर्खेतमा आज सम्पन्न ‘प्रथम ज्ञान कर्णाली हाफ म्याराथन’को उपाधि नरेन्द्रसिंह रावत र पुष्पा भण्डारीले हासिल गरेका छन् ।

    रावतले एक घण्टा ११ मिनेट २५ सेकेन्ड र भण्डारीले एक घण्टा २८ मिनेट १७ सेकेन्ड २१ किलोमिटर दूरी पार गरेका हुन् । पुरुषतर्फ दोस्रो हुने रामजी बस्नेतले एक घण्टा ११ मिनेट ४८ र तेस्रो हुने श्रीकेश राईले एक घण्टा १३ मिनेट २३ सेकेन्डमा उक्त दूरी पार गरेका हुन् ।

    त्यस्तै, महिलातर्फ हुने दोस्रो सिर्जना पाण्डेले एक घण्टा ३२ मिनेट ४३ सेकेन्ड र तेस्रो हुने राज्यलक्ष्मी रावलले एक घण्टा ३६ सेकेन्ड ४० मिनेटमा सो दूरी पार गरेकी थिइन् । प्रतियोगितामा प्रथम, द्वितीय र तृतीय हुने महिला तथा पुरुष खेलाडीहरुलाई क्रमशः रु ५५, ३० र २० हजार पुरस्कार तथा प्रमाणपत्र प्रदान गरिएको छ ।

    पुरुष सबै नेपाली सेना रहेका छन् । महिलातर्फ भण्डारी सशस्त्र प्रहरी, पाण्डे नेपाली सेना र रावल जुम्लाका रहेका छन् । विजयी पुरुष तथा महिला खेलाडीलाई कर्णाली प्रदेश सरकारका मुख्यमन्त्री यामलाल कँडेलले पुरस्कारसहित ट्रफी प्रदान गरेका थिए ।

    पाँच किलोमिटर छात्रतर्फ प्रथम अजय विश्वकर्मा, द्वितीय नवराज बानियाँ तृतीय रमेश बुढा र छात्रातर्फ प्रथम विमला कार्की, दोस्रो पूर्णिमा बुढाथोकी, लक्ष्मी शाही तृतीय भएकी थिइन् । प्रथम, द्वितीय र तृतीय हुन सफल छात्र तथा छात्रालाई क्रमशः रु १०, सात र पाँच हजार नगद तथा प्रमाणपत्र प्रदान गरिएको छ ।

    त्यस्तै, आजै सम्पन्न हाफ म्याराथन प्रतियोगितामा ४५ वर्षमाथिका खेलाडीमा प्रथम काठमाडौँका धर्म महर्जन, द्वितीय रेवत दाहाल र तृतीय गङ्गबहादुर पुनमगर भएका छन् । उनीहरुलाई क्रमशः रु १५, १० र पाँच हजार पुरस्कार तथा प्रमाणपत्र प्रदान गरिएको ‘प्रथम कर्णाली हाफ म्याराथन’का संयोजक देवकुमार सुवेदीले जानकारी दिए ।

    सो म्याराथनको व्यवस्थापन क्रियटिभ गञ्ज मिडिया एन्ड इभेन्ट म्यानेजमेन्टले गरेको थियो । कर्णालीको दौड संस्कृतिको विकाससँगै पर्यटन प्रवद्र्धन गर्न तथा यहाँका स्थापित धावकलाई प्रोत्साहन गर्ने उद्देश्यले आयोजना गरिएको उक्त प्रतियोगितामा एक हजार बढीले भाग लिएको आयोजकले जनाएको छ ।


    सुनाैलाे नेपाल
    सम्बन्धित समाचार
    © 2024 All right reserved to Sunaulonepal.com  | Site By : SobizTrend