काठमाडौँ । जिल्ला प्रहरी कार्यालय, सिराहाको शौचालयमा महिला प्रहरी जवान मृत फेला परेको घटनामा एक जना पक्राउ परेका छन् ।
गएको जेठ ३१ गते २५ वर्षीया प्रहरी जवान करिश्मा सुनार जिल्ला प्रहरी कार्यालयको महिला बालबालिका तथा जेष्ठ नागरिक सेवा केन्द्र भवनको दोस्रो तलामा रहेको शौचालयमा मृत फेला परेकी थिइन् । उनी शौचालयमा झुन्डिएको अवस्थामा फेला परेकी थिइन् ।
यस घटनामा प्रहरीले एक जना पुरुषलाई आत्महत्या दुरुत्साहनको कसुरमा पक्राउ गरेको स्रोतले बतायो । स्रोतका अनुसार पक्राउ पर्नेमा दैलेख घर भई बाँके बैदनाथ गाउँपालिका वडा नम्बर २ बस्ने २७ वर्षीय पुष्कर थापा मगर रहेका छन् ।
जिल्ला प्रहरी कार्यालय, सिराहामा ल्याएर उनीविरुद्ध आत्महत्या दुरुत्साहन मुद्दामा प्रहरीले अनुसन्धान अघि बढाएको जनाइएको छ । अनुसन्धानका निम्ति सिराहा जिल्ला अदालतबाट म्याद थप गरिएको स्रोतको दाबी छ ।