काठमाडौं । गत आर्थिक वर्ष कामना सेवा विकास बैंकको खुदनाफा ६७ प्रतिशत बढेको छ । गत आर्थिक वर्षमा बैंकले ६० करोड ३२ लाख १७ हजार रुपैयाँ खुदनाफा गरेको छ । अघिल्लो वर्षको यसैअवधिमा बैंकले ३६ करोड १३ लाख ६४ हजार रुपैयाँ खुदनाफा गरेको थियो ।

गत वर्ष बैंकले २४ करोड १८ लाख रुपैयाँ खुदनाफा बढाएको बुधबार सार्वजनिक गरिएको वित्तीय विवरणमा उल्लेख छ । बैंकको निष्क्रिय कर्जा घटेपछि नाफामा सुधार आएको हो । पुरानो कर्जा ३० करोड ४० लाख रुपैयाँ असुली भएको बैंकले जनाएको छ । समीक्षा अवधिमा बैंकको निष्क्रिय कर्जा घटेर ०.८६ प्रतिशतमा सिमित भएको छ । बैंकको वितरणयोग्य नाफा ३० करोड ९२ लाख रुपैयाँ छ ।

यसअवधिमा खुदब्याज आम्दानी २।७८ प्रतिशत बढेर २ अर्ब १२ करोड ५२ लाख १७ हजार रुपैयाँ पुगेको छ । बैंकको चुक्ता पुँजी ३ अर्ब २८ करोड ११ लाख ६४ हजार रुपैयाँ छ । नाफासँगै प्रतिसेयर आम्दानी पनि बढेको छ । प्रतिसेयर आम्दानी ७ रुपैयाँ ३७ पैसाबाट बढेर १८ रुपैयाँ ३८ पैसा पुगेको छ । प्रतिसेयर नेटवर्थ १ सय ६४ रुपैयाँ ४८ पैसा छ ।

समीक्षा अवधिमा बैंकले निक्षेप परिचालन बढेर ५९ अर्ब ६ करोड रुपैयाँ पुगेको छ । अघिल्लो वर्षको यसै अवधिमा बैंकको निक्षेप परिचालन ५३ अर्ब ४७ करोड रुपैयाँ थियो । यस्तै बैंकले ४५ अर्ब ९६ करोड रुपैयाँ कर्जा प्रवाह गरेको छ ।