काठमाडौँ । ललितपुरस्थित गोदावरी नगरपालिकाका मेयर गजेन्द्र महर्जनले भ्रष्टाचार मुद्दामा सफाइ पाएका छन् ।

विशेष अदालतले बुधबार यससम्बन्धी पाँच मुद्दामा फैसला गर्दै भ्रष्टाचार मुद्दामा गोदावरी नगरपालिकाका मेयरसहित सबैलाई सफाइ दिने फैसला सुनाएको हो ।

यस मुद्दामा विशेषका अध्यक्ष टेकनारायण कुँवर तथा सदस्यहरू तेजनारायणसिंह राई र रितेन्द्र थापाले दाबी नपुग्ने फैसला सुनाएका हुन् ।

अख्तियार दुरुपयोग अनुसन्धान आयोगले यसै वर्ष २१ जेठमा गोदावरीका मेयर महर्जनसमेतलाई प्रतिवादी बनाउँदै पाँचवटा मुद्दा दायर गरेको थियो । आर्थिक वर्ष ०७५/७६ देखि नै वार्षिक रूपमा राजस्व हिनामिना गरेको अभियोग लगाइएको थियो ।

सबै मुद्दामा गरी एक अर्ब रुपैयाँ बिगो निर्धारण गरी मुद्दा दायर भएकोमा विशेषले सफाइ दिएको हो ।

विशेष अदालतले गोदावरी नगरपालिकाले कानुन बनाएर नदीजन्य पदार्थमा बागमती प्रदेशसभाले बनाएको कानुन भन्दा घटी कर निर्धारण गरेको भन्दै यो संवैधानिक व्याख्याको प्रश्न रहेको ठहर गरेको छ ।

अख्तियार दुरुपयोग अनुसन्धान आयोगले गत २१ जेठमा मेयर गजेन्द्र महर्जन, उपमेयर मुना अधिकारीसहित १४ जनाविरुद्ध भ्रष्टाचार मुद्दा दायर गरेको थियो ।