गौरीबहादुर कार्की नेतृत्वको छानबिन आयोग एमालेलाई मञ्जुर छैन : ओली

सुनौलो नेपाल

बिहिवार , आश्विन २३, २०८२

गौरीबहादुर कार्की नेतृत्वको छानबिन आयोग एमालेलाई मञ्जुर छैन : ओली

काठमाडौं । नेकपा एमालेका अध्यक्ष केपी शर्मा ओलीले जेनजी आन्दोलनका क्रममा सरकारी दमनमाथि छानबिन गर्न बनेको आयोगको प्रतिवेदन स्वीकार्य नहुने बताएका छन् ।

बिहीबार भक्तपुरको गुन्डुमा आयोजित कार्यक्रमलाई सम्बोधन गर्दै ओलीले यो आयोग र त्यसले तयार पार्ने प्रतिवेदन अस्वीकार गर्ने बताएका हुन् ।

उनले भने, ‘पहिले नै केपी ओली समात्नुपर्छ, थुन्नुपर्छ भन्ने मान्छेहरुको आयोग बनाएर छानबिन गरेर प्रतिवेदन दिएको नाटक गर्ने अनि त्यो प्रतिवेदनको आधारमा अगाडि बढे भन्ने नाटक गर्ने, यस्ता नाटक नेकपा एमालेलाई मञ्जुर छैन । स्वीकार्य छैन ।’

२३ भदौको जेनजी विद्रोहमाथि सरकारी दमनबारे छानबिन गर्न सरकारले गौरीबहादुर कार्कीको नेतृत्वमा आयोग गठन गरेको छ ।

उनले वर्तमान सरकार नेपालीको समेत नभएको टिप्पणी गरे।

‘मैले अस्ति पनि भनेँ, यो सरकार जसरी बन्यो, मैले संक्षिप्तमा मात्रै भनेको छु, यो सरकार हाहुबाट बनेको हो। यसको अलिक व्याख्या गरेको छैन, समयमा गरौंला, यो कसैको प्रतिनिधि होइन। नेपालीको चाहिँ होइन। अन्त कतैको भए थाहा छैन। कसैले छानेको सरकार होइन यो। उहाँहरू एउटा खास उद्देश्यले काम गरिरहनुभएको छ,’ उनले भने।