कांग्रेसभित्र विशेष महाधिवेशन माग गर्दै संकलन भएको हस्ताक्षर बुधबार कार्यबाहक सभापतिलाई बुझाइने

सुनौलो नेपाल

मंगलवार , आश्विन २८, २०८२

काठमाडौं । नेपाली कांग्रेसभित्र विशेष महाधिवेशन माग गर्दै संकलन भएको हस्ताक्षर बुधबार कार्यबाहक सभापतिलाई बुझाइने भएको छ ।

मंगलबार नै हस्ताक्षर बुझाउने भन्दै पार्टी कार्यालय पुगेका नेता कार्यकर्ताहरुलाई महामन्त्री गगन कुमार थापा र विश्वप्रकाश शर्माको आग्रहपछि बुधबार हस्ताक्षर बुझाउने गरी फर्काइएको हो । नेता कार्यकर्ताहरुले मंगलबार नै आफुहरुको हस्ताक्षर बुझ्नुपर्ने भन्दै नारावाजी गरेका थिए ।

त्यसपछि महामन्त्री थापाले मंगलबार केन्द्रीय समिति बैठकमा पार्टी सभापति शेर बहादुर देउवाले कार्यबाहक सभापति तोकेको र महाधिवेशन समयमा नै गर्न निर्देशन समेत दिएको हुनाले उनको सम्मानस्वरुप बुधबार मात्रै विशेष महाधिवेशन माग्दै संकलन भएको हस्ताक्षर बुझाउन आग्रह गरेका थिए ।

मंगलबार केन्द्रीय समिति बैठकमा सभापति देउवाको अन्तिम उपस्थीत भएकाले पनि त्यसलाई पनि सम्मान गर्दै केन्द्रीय समिति अन्य एजेण्डमा प्रवेश नगरेको उनले बताए । थापाले बुधबार तीन बजे नेता तथा कार्यकर्तालाई पार्टी कार्यालयमा स्वागत गर्ने र हस्ताक्षर कार्यबाहक सभापतिलाई बुझाउने व्यवस्था गर्ने उल्लेख गरे ।

विशेष महाधिवेशन माग गर्दै कांग्रेसका केहि नेता कार्यकर्ताले हस्ताक्षर संकलन गरेका थिए । उनीहरुले ५० प्रतिशत भन्दा बढि प्रतिनिधिहरुले विशेष महाधिवेशनको पक्षमा हस्ताक्षर गरेको दावी गरेका छन् ।