मंगलवार, जेठ २६ गते २०८३
मंगलवार, जेठ २६ गते २०८३
मंगलवार, जेठ २६ गते २०८३
मंगलवार , पौष २२, २०८२
काठमाडौँ । पूर्व गिनिज विश्व कीर्तिमानधारी तथा चर्चित स्मरणशक्ति खेलाडी कृष्ण पाण्डेयले माघ ६ गते काठमाडौँमा पुनः गिनिज विश्व कीर्तिमान बनाउने प्रयास गर्ने भएका छन्। कार्यक्रम बागबजारस्थित मोडेल इन्स्टिच्युट अफ टेक्नोलोजी (एमआईटी) कलेजको आयोजनामा हुने भएको हो।
काठमाडौँ मोडेल माध्यमिक विद्यालय (केएमएसएस), बागबजारमा आयोजना हुने कार्यक्रममा पाण्डेयले '५० शब्द उल्टो हिज्जे गर्ने सबैभन्दा छिटो समय' शीर्षकअन्तर्गत आधिकारिक गिनिज विश्व कीर्तिमान प्रयास गर्नेछन्। उक्त प्रयास गिनिज विश्व कीर्तिमान संस्थाले तोकेका कडा नियम, मापदण्ड र प्रमाणीकरण प्रक्रियाअनुसार सम्पन्न गरिने आयोजकले जनाएको छ।
कार्यक्रम एमआईटी कलेजको आयोजनामा केएमएसएसको सहकार्यमा हुँदैछ भने बेस्ट वेस्टर्न प्लसले आतिथ्य सेवाका लागि सहकार्य गर्नेछ। एमआईटीका सह–संस्थापक आर. के. दाहालका अनुसार कीर्तिमान प्रयास पूर्ण रूपमा नियन्त्रित, पारदर्शी र ध्यानभंगरहित वातावरणमा गरिनेछ। यसका लागि स्वतन्त्र साक्षी, आधिकारिक समयमापक तथा व्यावसायिक फोटो–भिडियो अभिलेखीकरणको व्यवस्था गरिएको छ।
आयोजकका अनुसार यो पहलले नेपाली प्रतिभालाई विश्वस्तरमा चिनाउने र युवाहरूलाई प्रेरित गर्ने उद्देश्य बोकेको छ। अन्तर्राष्ट्रिय अमेरिकी विश्वविद्यालयसँग आबद्ध एमआईटी कलेजले सूचना प्रविधि तथा व्यवस्थापन क्षेत्रमा विश्वस्तरीय शिक्षा प्रदान गर्दै आएको र यस्ता कार्यक्रममार्फत व्यवहारिक तथा अनुभवात्मक सिकाइलाई प्रवर्द्धन गर्दै आएको जनाएको छ।
कीर्तिमान प्रयासबारे कृष्ण पाण्डेयले भने, “विदेशमा गिनिज विश्व कीर्तिमान हासिल गरेपछि नेपालमै पुनः कीर्तिमान प्रयास गर्न पाउनु गर्वको विषय हो। यो प्रयासले नेपाली युवाहरूमा आत्मविश्वास र प्रेरणा जगाउने विश्वास लिएको छु।”
कार्यक्रमलाई सफल र विश्वसनीय रूपमा सम्पन्न गर्न सबै सरोकारवाला पक्षबीच औपचारिक सम्झौता भइसकेको आयोजकले जनाएको छ। माघ ६ गते हुने कार्यक्रममा कीर्तिमान प्रयाससँगै सञ्चारकर्मीसँग अन्तरक्रिया तथा सहकार्य गर्ने संस्थाहरूको सम्मानसमेत गरिनेछ।
कार्यक्रमको विस्तृत विवरण क्रमशः सार्वजनिक गरिने आयोजकले बताएका छन्।
Be the first to comment!
© 2026 All right reserved to sunaulonepal.com
Design & Developed By
प्रतिक्रिया दिनुहोस