काठमाडौं । दीपक मनाङ्गे (राजीव गुरुङ)ले गण्डकी प्रदेशको युवा तथा खेलकुद मन्त्रालय सम्हालेका छन् । 

विना विभागीय मन्त्री बनेको झण्डै एक महिनापछि उनले खेलकुद मन्त्रालयको जिम्मेवारी सम्हालेका हुन् । मन्त्रालय सम्हाल्दै मनाङगेले निवर्तमान मुख्यमन्त्री पृथ्वीसुब्बा गुरुङ नेतृत्वको सरकार राम्रो भएको बताएका छन् । उनले भने, ‘पृथ्वीसुब्बा दाइकै सरकार राम्रो थियो, यो सरकार चलाउन सक्दैन ।’ 

पृथ्वीसुब्बा गुरुङ नेतृत्वको सरकारमा पनि उनले खेलकुद मन्त्रालयको जिम्मेवारी सम्हालेका थिए ।

अहिलेको सरकारमा भौतिक पूर्वाधार मन्त्रालय पाउनुपर्ने मनाङ्गेको माग भएपनि उनलाई फेरि खेलकुद मन्त्रालयकै जिम्मेवारी दिइएको हो । उनीसँगै जनता समाजवादी पार्टीका (जसपा)का हरिशरण आचार्यले ऊर्जा, जलस्रोत तथा खानेपानी मन्त्रालयको जिम्मेवारी पाएका छन् । यसअघि आचार्यले अर्थ मन्त्रालयमा दाबी गरेका थिए । 

जेठ २९ गते मुख्यमन्त्री कृष्णचन्द्र नेपाली पोख्रेलसँगै चार जना मन्त्रीले सपथ लिएका थिए । तर केही दिनअघि कांग्रेसका कुमार खड्काले शिक्षा, संस्कृति, विज्ञान प्रविधि तथा सामाजिक विकास मन्त्रालय र माओवादी केन्द्रकी मधुमाया अधिकारीले स्वास्थ्य तथा जनसंख्या मन्त्रालय मन्त्रालयको जिम्मेवारी पाएपनि आचार्य र मनाङ्गे जिम्मेवारी विहिन थिए । 

हेर्नुहोस् पद बहालीको भिडियो