काठमाडौं । संसदमा प्रतिनिधित्व गर्ने दलहरुले प्रमुख प्रतिपक्षी नेकपा एमालेलाई सम्वादमा ल्याउन सभामुखलाई सुझाव दिएका छन् ।

एमालेले लगातार संसदमा नाराबाजी गरेपछि सभामुख अग्निप्रसाद सापकोटाले सोमबार संसदमा भएका दलका शीर्ष नेताहरुको बैठक बोलाएका थिए । तर बैठकमा एमालेका नेताहरु उपस्थित भएनन् । एमाले नै अनुपस्थित भएपछि बैठक कुनै निष्कर्षमा पुग्न सकेन । बैठकमा सहभागी दलका नेताहरुले एमालेसँग सम्वाद र समहमति गरेर मात्र बैठक बोलोन सुझाए । 

बैठकपछि राष्ट्रिय जनमोर्चाकी उपाध्यक्ष दुर्गा पौडेलले भनिन्, ‘जोसँग सम्बन्धित थियो, उहाँहरु नै नआइदिनुभएको हुनाले कुनै निष्कर्षमा पुग्न सकिँदैन भन्ने आयो । प्रतिपक्षलाई सम्वादमा ल्याएर मात्र सर्वदलीय बैठक बोलाउन आग्रह गरेका छौं ।’

बैठकमा सभामुख सापकोटाले आफूले विहानसम्म पनि एमालेका नेतालाई बोलाउने प्रयास गरेको, तर सम्भव नभएको बताएका थिए । कानूनमन्त्री ज्ञानेन्द्रबहादुर कार्कीले पनि एमाले संसदीय दलका उपनेता सुवास नेम्वाङसँग सोमबार विहान भएको सम्वाद सुनाएका थिए । 

दलका नेताले सोमबारको बैठकमा नजान भनेका कारण बैठकमा आउन नसक्ने उनले बताएका थिए । एमालेले कारबाही गरिएका १४ संसदको पद खारेज नगरेसम्म संसद चल्न नदिने अडान राख्दै आएको छ । एमालेले सभामुखले एमाले पार्टी विभाजन गर्न मुख्य भूमिका खेलेको आरोप समेत लगाएको छ ।