काठमाडौं । सत्तारुढ प्रमुख घटक नेपाली काँग्रेसकी सांसद डा. डिला संग्रौलाले किसानले मल अझै पाउन नसकेको भन्दै सरकारको चर्को आलोचना गरेकी छन् । बिहीबार प्रतिनिधिसभा बैठकको शुन्य समयमा बोल्दै सांसद संग्र्रौलाले मानो रोपेर मुरी उमार्ने बेलामा सरकारले किसानलाई मल उपलब्ध गराउन नसकेको उल्लेख गर्दै आक्रोश व्यक्त गरेकी हुन् ।

उनले किसानले मल कहिले पाउँछन ? त्यसबारे संसदलाई जानकारी गराउन पनि सरकारसँग माग गरिन् । सांसद संग्रौलाले बाढि, पहिरो पीडितहरुलाई राहत दिने तथा उद्दार गर्ने र प्रकोप न्यूनिकरणका सम्बन्धमा सरकारले के गरिरहेको छ नि जिज्ञासा समेत राखिन् ।

उनले भनिन्, ‘अहिले देशभरी नै बाढि, पहिरोका कारण जनजीवन आक्रान्त छ । बाटोघाटो अवरुद्ध छन । कतिपय क्षेत्रमा ठूलो धनजनको क्षति भएको छ । मानो रोपेर मुरी उमार्ने बेला किसानले मल पाएका छैनन, सभामुख महोदय । सरकारको ध्यान अन्यत्र मोडिएजस्तो देखिन्छ । किसानले मल पाउँछन कि पाउँदैनन ? पाए भने कहिले पाउँछन ? सदनलाई जानकारी गराउन र बाढि पहिरो पीडितहरुको राहत, उद्दारका साथै प्रकोप न्यूनिकरण गर्न सरकारले के गरिरहेको छ ? त्यसबारे जानकारी गराउन माग गर्दछु ।’