काठमाडौं । श्रम, रोजगार तथा सामाजिक सुरक्षामन्त्री शेरबहादुर कुँवरले वैदेशिक रोजगारीमा पठाउने नाममा भइरहेको ठगी नियन्त्रण गर्ने बताएका छन् । आईतवार मन्त्रालयको कल सेन्टरमा श्रमिकहरुको गुनासो सुनेपछि सञ्चारकर्मीहरुसँग बोल्दै मन्त्री कुँवरले सरकारले शुन्य लागतमा पठाउने भनिएका देशहरुमा समेत एजेण्टहरुमार्फत जताततै श्रमिकहरु ठगेको भन्दै तत्काल नियन्त्रण गर्ने बताएका हुन् ।

उनले शुन्य लागतमा वैदेशिक रोजगारीमा जानसक्ने सम्झौता भएका देशहरुमा समेत एजेण्टहरुले साढे ३ लाखसम्म लिएको गुनासो आएकाले मन्त्रालयले त्यसको अनुगन शुरु गरेको बताए । मन्त्री कुँवरले मन्त्रालयमा ठगिएको भनेर आएका गुनासोहरुलाई मन्त्रालयले सहजिकरण गर्ने बताए । उनले वैदेशिक रोजगारी पठाउने नाममा जताततै ठगी हुदाँ सरकारलाई अफ्ठ्यरो लागेको बताए ।

मन्त्री कुँवरले ठगी भएको जानकारी मन्त्रालयमा नआउँदा अनुगमन गर्न समेत नसकिएको बताए । उनले अनुगनको लागि अनुगमन टोलीले प्रमाण र पैसा केही नभेट्यो गरेको बताए । मन्त्री कुँवरले ठगी भएको प्रमाण नभई कारबाहीको दायरामा ल्याउन नसकिएको बताए । उनले अब सरकारले ठगी गर्ने एजेण्टहरु कहाँ बस्छन् खोज अनुसन्धान गरेर कानूनी कारबाही गरिने बताए । मन्त्री कुँवरले कल सेन्टरमार्फत श्रमिकका गुनासाहरु तत्काल र केही समय लगाएर भएपनि समाधान मन्त्रालयले गरिरहेको दाबी गरे । उनले पछिल्लो समय वैदेशीक रोजगारको क्षेत्र, घरजग्गा कारोबार हुँदाहुँदै फोहोर व्यवस्थापनमा समेत दलाली हुन थालेको बताए ।

उनले भने,‘ कल सेन्टरमा श्रमिकका समस्या तत्काल पनि समाधान गरेका छौं । कल सेन्टर कल सेन्टरको लागि मात्रै होइन । तत्काल समाधान गर्ने माध्यम पनि भएको छ । श्रमिकहरुबाट आएका जटिल खालका गुनासा भए केही समय लाग्छ । सामान्य प्रकारका गुनासा कल सेन्टरले पनि गर्छ । बाँकी विभागहरु र मन्त्रालयले गर्ने गरेको छ । धेरै गुनासाहरु समाधान नभएर थन्किएका छैनन् । केही जटिल प्रकारका भएकाले केही समय लाग्छ । मन्त्रालयले रोमनियाको लागि साढे ३ लाख लिएर पठाइँदै छ भनेर सुनौं । शंका लागेको व्यक्तिलाई मन्त्रालयले एक घण्टाभित्र बोलाएर स्पष्टीकरण सोधेका छौं । शंका गरेको व्यक्तिहरुले अन्त पनि देखाएको छ । मन्त्रालयका यस्ता जानकारी आउँदैन । अब अलिअलि अफ्ठ्यारो पनि लाग्न थाल्यो ।

शुन्य लागतमा पठाउने भनेका छौं जताततै पैसा असुल भएको छ । त्यसको नियन्त्रण भएको छैन । त्यसको नियन्त्रणको लागि अनुगमन टोली पठायौं । टोलीले केही पनि भेटाउँदैन । पैसा र प्रमाण केही भेटाउँदैन । प्रमाण नभई कारबाहीको दायरामा कसरी ल्याउने सरकारलाई समस्या परेको छ । त्यस्तो भइरहेको सबै ठाँउबाट जानकारी आउनुप¥यो । सबै मन्त्रालय,प्रहरी पत्रकार सबै जना जाऔं मेनापावरले अफिसमा पैसा असुल गर्दैन । त्यस्ता एजेण्टका कहाँ छ बस्ने ठाँउहरु त्यसको सोधि खोजि गरौं ।

वैदेशिक रोजगारीमा पठाउने नाउँमा जताततै ठगीको कामलाई नियन्त्रण गर्नुपर्छ । अहिले घर जग्गामा दलाली छ । अहिले फोहोर उठाउने विषयमा समेत दलाली चल्न थालेको छ । यो सबैको समाधानको लागि राज्यको मात्रै काम हो भनेर बस्दा समाधान गर्न सकिँदैन । त्यसको लागि सबैको भुमिका महत्वपूर्ण हुन्छ ।’

मन्त्री कुवरले आईतवार चार जना श्रमिकहरुको गुनासो सुनेका छन् । उनले वैदेशिक रोजगारीमा लैजान्छु भनेर महिनौ नलगिएको,वैदेशिक रोजगारीमा गएर घर आउन नदिएको जस्ता गुनासा श्रमिकहरुले मन्त्री कुँवरलाई गरेका थिए । मन्त्री कुँवर श्रमिकको गुनासो यसरी सुने । श्रममन्त्री कुँवरले हेरक हप्ताको आईतवार एक घण्टा कल सेन्टरमा श्रमिकको गुनासो सुन्ने कार्य गरिरहेका छन् ।