काठमाडौं । नेकपा एमालेका वरिष्ठ उपाध्यक्ष ईश्वर पोखरेलले नेकपा एमालेले केपी ओलीको नेतृत्वमा पुनः सरकार बनाउने दाबी गरे । शुक्रवार काठमाडौंमा नव निर्मित चुनदेवी ज्येष्ठ नागरिक सत्तल तथा बाल उद्यानको उद्घाटन कार्यक्रमलाई सम्बोधन गर्दै वरिष्ठ उपाध्यक्ष पोखरेलले यस्तो बताएका हुन् ।

उनले राष्ट्रिय विकास र समृद्धिको योजनमा पार्टी केन्द्रित हुने र नक्कली कुरा गरेर खेतका गह्रागह्रामा सुरुङ खन्ने काम नगर्ने बताए । वरिष्ठ उपाध्यक्ष पोखरेलले नक्कली कुरा गरेर सत्ता स्वार्थमा डुब्न नचाहने पनि बताए । उनले रणनीतिक महत्वका सडकहरु केपी शर्मा ओलीको नेतृत्वमा शुरु भएको भन्दै अहिलेको सरकारले किन कटौती गरेको भन्ने प्रश्न गरे । उनले चुच्चे नक्शा मेटाइ अपराधपूर्ण काम गर्ने कोही व्यक्तिलाई पनि स्वीकार गर्न नसकिने बताउनु भयो । मुलुकमा राजनीतिक स्थायित्व नभए आर्थिक विकास र समृद्धि हुन नसक्ने बताए ।

उनले भने, ‘रणनीतिक महत्वका सडकहरु काम प्रारम्भ भएका थिए, कनि कटौती गरियो ? ३०० भन्दा धेरै अस्पताल बनाउने कुराको प्रारम्भलाई किन अवरुद्ध गरियो ? जयसिंह धामीलाई तुइन काटेर हत्या गरियो, गठबन्धन सरकार चुँसम्म बोल्न सकेन । चुच्चे नक्शा मेटाउने अपराधपूर्ण काम गर्ने जोसुकै होस् ती पात्रहरुलाई हामी कहिल्यै स्वीकार गर्न सक्दैनौँ । नागरिकता विधेयकमा राष्ट्रिय हीत विपरित काम गर्ने कुराप्रति हामी स्वीकार गर्न सक्दैनौँ । मुलुकमा एउटा कुरा गर्न जरुरी छ । दलहरुका कमजोरी छन्, जनताले फैसला गर्नेछन् । तर यो मुलुकमा राजनीतिक स्थायित्व भएन भने आर्थिक विकास र समृद्धि हुन सक्दैन । राष्ट्रिय स्वाभिमान र स्वतन्त्रता कमजोर हुन्छ । सामाजिक सद्भाव खल्बलिन्छ । हामी केपी ओलीको नेतृत्वमा आगामी सरकार बनाउँछौँ । यो उद्घोष गरिसकेका छौँ । राष्ट्रिय विकास र समृद्धिको योजनमा केन्द्रित हुन्छौँ । छिमेकीसँग लडाईं गर्ने भनेर नक्कली कुरा गरेर खेतका गह्रागह्रामा सुरुङ खन्दैनौँ । तर छिमेकीसँग आँखामा आँखा जुधाएर कुरा गर्छौं । हामी नक्कली कुरा गरेर सत्ता स्वार्थमा डुब्न चाहँदैनाँै । नक्कली कुरा गर्ने, अन्तर्राष्ट्रिय जगतमा ठगी गर्दै हिँड्ने, राष्ट्रिय राजनीतिमा अपराध गर्नेहरुलाई कहिल्यै छुट दिनेछैनौँ ।’

वरिष्ठ उपाध्यक्ष पोखरेलले जनताका हकहीत, विकास निर्माण र सामाजिक सुरक्षाका विषयमा सबै राजनीतिक पार्टी एक हुनुपर्ने बताए ।