काठमाडौं । नेकपा एमालेका अध्यक्ष केपी शर्मा ओलीले समृद्ध नेपाल सुखी नेपाली भन्ने आँट नेकपा एमाले बाहेक नेपालका कुनै राजनीतिक दल र नेता कार्यकर्तामा नभएको बताए । उनले बाहिरबाट भ्रष्टाचार हुन नहुने भन्ने तर भित्रभित्रै भ्रष्टाचार गर्ने नीति अन्य दलको नीति भएको तर नेकपा एमालेको नीति नरहेको बताए । बिहीवार पार्टी कार्यालयमा पार्टी प्रवेश कार्यक्रमलाई सम्बोधन गर्दै उनले यस्तो बताएका हुन् ।

अध्यक्ष ओलीले आगामी निर्वाचनमा नेकपा एमालेले हार्नै नमिल्ने बताए । उनले देश, जनता, लोकतन्त्र, भ्रष्टाचार, शान्ति सुव्यवस्था, स्थिरता र स्थायित्वका लागि हार्न नमिल्ने बताए । उनले देशको विकास र समृद्धिको अभियान अघि बढाउने काम नेकपा एमाले बाहेक अन्य दलहरुले गर्न नसक्ने बताए । उनले गठबन्धनले अहिले देशलाई अधोपतनतिर लगिरहेको भन्दै देशलाई बचाउन एमालेको विकल्प नरहेको उल्लेख गरे । उनले आगामी निर्वाचनमा सम्पूर्ण शक्ति लगाएर प्रतिक्रियावादीहरु आफ्नो बिरुद्धमा आउने भन्दै मतवृद्धि गर्ने कुरादेखि लिएर मत रक्षा गर्ने कुरासम्म चनाखो हुन निर्देशन दिए । अध्यक्ष ओलीले अहिलेका गठबन्धनका महारथी भनेर आफूलाई ठान्नेहरु कागजी बाघमात्र भएको उल्लेख गर्दै गठबन्धनरुपी चक्रव्यूह तोड्न एमाले सक्षम रहेको बताए ।

उनले भने, ‘आइरहने आवधिक निर्वाचनहरु हुन्छन्, ४/५ वर्षमा निर्वाचन आइरहन्छ, पार्टीहरु हार्छन्, जित्छन् भइरहन्छ । तर यो निर्वाचन त्यस्तो निर्वाचन होइन । यो निर्वाचन सामान्य निर्वाचन होइन । यसको विशेष अर्थ छ, विशेष महत्व छ । यो निर्वाचनमा नेकपा एमाले हार्नै मिल्दैन । देशका, जनताका लागि हार्न मिल्दैन । लोकतन्त्रका लागि हार्न मिल्दैन । भ्रष्टाचार नियन्त्रणका लागि हार्न मिल्दैन । शान्ति सुव्यवस्थाका लागि हार्न मिल्दैन । स्थिरता स्थायित्वका लागि हार्न मिल्दैन । देशको विकासको अभियान अघि बढाउनको लागि हार्न मिल्दैन ।

अहिले देशलाई राजनीतिक, आर्थिक, सामाजिक, सांस्कृतिक हरेक हिसावले अधोपतनतिर लगिरहेका छन् । निर्लज्ज ढंगले देशलाई लगेका छन् । यसबाट बचाउन एमाले बाहेक अरु कोही छैन । त्यसका लागि एमालेले देशका लागि जित्नुपर्छ । यसका लागि अत्यन्त तीब्र तयारी गर्न म आग्रह गर्न चाहन्छु । हामीले मतवृद्धि गर्ने कुरादेखि लिएर मत रक्षा गर्ने कुरासम्म सम्पूर्ण शक्ति लगाएर प्रतिक्रियावादीहरु हाम्राबिरुद्ध आउनेछन् । संविधानमा कहाँ छ परमादेशबाट सरकार बनाउने कुरा ? गठबन्धनरुपी चक्रव्यूह तोड्न एमाले सक्षम रहेको छ । अहिलेका महारथी ठान्नेहरु कागजका बाघहरु मात्रै हुन् ।’