काठमाडौँ । कलाकार दीपकराज गिरीले एकले अर्कोलाई राष्ट्रघाती तथा अर्कोले अर्कोलाई तानाशाह भन्ने कुरा अर्को भिडन्तको सङ्केत भएको बताएका छन् । उनले यसले अहिलेको भोक र गरिबीलाई एकातिर छाडेर, मुद्दा अन्तै मोडिने टिप्पणी गरेका छन् ।

सामाजिक सञ्जाल फेसबुकमा उनले लेखेका छन्– ‘अदृश्य शक्तिलाई त जसरी पनि लडाउनु नै छ । अब हामी देश विकासको लागि होइन, को बढी देशभक्त हो भनेर लड्ने छौँ।’

‘पहिला हाम्रा पुर्खा राष्ट्रको लागि विदेशीसँग लडे ! अब हामी राष्ट्रियताको नाममा आफू आफू लड्ने छौ ! यसबाट जुन पक्षले जिते पनि देशले चाहि हार्नेछ,’ कलाकार गिरीले भनेका छन् ।

स्ट्याटसमा कलाकार गिरीले दलहरूले जनअपेक्षा विपरीत काम गरेको, देशमा परिवर्तन अनेक भए पनि जनताको अवस्थामा खासै केही परिवर्तन नआएको समेत उल्लेख गरेका छन् ।

‘धनी हरेक दिन धनी बन्दै गए, गरिब झन् झन् गरिब, पहुँच हुनेहरूको लागि हरेक सुविधा ढोकामै उपलब्ध हुने, तर भुईँ मान्छेको लागि सामान्य भन्दा सामान्य कुरा पनि दुर्लभ हुन थाल्यो !’

अहिलेका दलहरू र तिनका कार्यकर्ताको तडक भडकको शैलीले जनताहरूमा झन् नैराश्यता आएको कलाकार गिरीको भनाई छ ।

https://www.facebook.com/deepakrajgiri84/posts/6567859293277689?ref=embed_post