काठमाडौं । नेपाल समाजवादी पार्टीका अध्यक्ष एवं पूर्वप्रधानमन्त्री डा. बाबुराम भट्टराईले बालुवाटारको ललिता निवास जग्गा अनियमितता प्रकरणसँग आफ्नो कुनै पनि स्वार्थ नजोडिएको बताएका छन् ।

उनले ललितता निवास जग्गा अनियमितता प्रकरणसहित सबै खाले भ्रष्टाचारका काण्डहरुको निष्पक्ष छानविन गर्नुपर्ने दोषी माथि कडा भन्दा कडा कानूनी कारबाही हुनुपर्ने समेत बताएका छन् ।

तत्कालीन प्रधानमन्त्री भट्टराईको पनि नाम ललिता निवास प्रकरणमा जोडिएपछि सामाजिक सन्जालमार्फत् स्पष्टीकरण दिँदै उनले लेखेका छन्– ‘अहिले सबै कुरा मलाई सम्झना छैन, मलाई हल्का सम्झना भएसम्म राज्यको समरजंग कम्पनीको नाममा दर्ता भएको करिब तीन रोपनी जग्गा पशुपति टिकिन्छा गुठीको भन्ने भएकाले वास्तविक तथ्यप्रमाण अभिलेख जाँचबुझ गरी नियम अनुसार गर्ने वा यस्तै आशयको नीतिगत निर्णय भएजस्तो लाग्छ । यो कुरा मैले अख्तियारको टोलीले केही वर्ष पहिले लिएको बयानमा पनि भनेको छु । तत्कालीन प्रमको हैसियतले मसँग जोडिएको कुरा यत्ति हो ।’

उनले अगाडि थप लेखेका छन्, ‘त्यसपछि केकसो भयो मलाई थाहा हुने कुरो भएन । कुनै पनि ढंगले यो प्रकरणमा मेरो वा मेरो निकट कुनै व्यक्तिको स्वार्थ जोडिएको छैन र कसैले आजसम्म त्यस्तो आरोप लगाएको पनि छैन ।’

भ्रष्टाचार गर्नेहरुलाई कारबाही हुनुपर्नेमा आफूले संसद र बाहिर पनि आवाज उठाउँदै आएको स्मरण गर्दै उनले यसमा आफू सधैँव प्रतिवद्ध रहेको बताएका छन् ।

‘देशमा राज्यको सम्पत्ति निजी लाभको निम्ति दोहन गर्ने र शक्तिको दुरूपयोग गर्ने प्रवृत्ति भयंकर रूपले झांगिएको स्थितिमा ललितानिवास लगायत सबै भ्रष्टाचारका काण्डहरूको निष्पक्ष छानविन होस् र दोषीलाई कडाभन्दा कडा कार्वाही होस् भन्ने कुरा मैले संसदमा र बाहिर पनि निरन्तर उठाउँदै आएको छु । त्यसमा म आजीवन प्रतिबद्ध रहनेछु ।’ उनले उल्लेख गरेका छन् ।

ललिता निवास र यस्तै प्रकारका अरु प्रकरणको पनि छिटो टुंगो लाग्नुपर्ने बताउँदै पूर्वप्रधानमन्त्री भट्टराईले लेखेका छन्– ‘यो र यस्ता प्रकरणको छिटो टुंगो लागोस् ताकि आम जनतालाई गुड र गोबर छुट्याउन सहज होस्, अनि कसैले आफ्नो दाग छोप्न अरूमाथि हिलो छ्याप्न नपाओस् ।’