काठमाडौं । जनमत पार्टीका अध्यक्ष डा.सिके राउतले धनुषाकी आरती साहको हत्याका दोषीलाई कारबाही गर्न माग गरेका छन् ।

राजधानीको माइतीघरमा धर्नामा बसेका साहका परिवारसँगको भेटका क्रममा आज (शनिबार) राउतले आरतीको हत्यारालाई कारबाही गर्न सरकारसँग माग गरेका हुन् ।

धनुषाकी २२ वर्षीय आरती साहको गत ७ जेठमा दाइजोको विवादका कारण हत्या भएको माइती पक्षको आरोप रहेको छ । हत्यारालाई तत्काल कारबाही गर्नुपर्ने माग गर्दै आरतीको माइती पक्ष र आफन्तले डेढ महिनादेखि माइतीघरमा धर्ना समेत दिइरहेका छन् ।

पैसा र राजनैतिक पहुँचको बलमा उक्त हत्याकाण्डलाई ढाकछोप गर्ने प्रयास भइरहेको पनि आरतीका माइती पक्षका परिवारको आरोप छ ।

घटनाबारे बयान लिने बहानामा आरतीको परिवार र माइती पक्ष बोलाएर प्रहरी उपरीक्षक विश्वराज खड्का र प्रहरी नायब उपरीक्षक वेदप्रकाश गौतमले कुटपिट गरेको आरतीको परिवारले जनाएको जनमत पार्टीले बताएको छ ।

उक्त घटनाको मुद्दा दर्ता नगरेको र छानबिनलाई प्रभावित पार्दै आएको भन्दै प्रहरीलाई समेत छानबिनको दायरमा ल्याउनुपर्ने जनमत पार्टीले माग गरेको छ ।

पीडितहरूले डेढ महिनादेखि न्यायका लागि माइतीघर मण्डलामा धर्ना दिँदै आएको बताउँदै अध्यक्ष राउतले दोषीहरूलाई अविलम्ब कारबाहीको दायरमा ल्याउन माग गरे ।