काठमाडौं । सौरभ ग्रुपले सञ्चालन गरिरहेको जगदम्बा स्पिनिङ मिल्स लिमिटेडको धागो उत्पादन क्षमता बढ्ने भएको छ । उद्योगले धागो उत्पादन क्षमता बढाएर वार्षिक २८ हजार टन पुर्याउने भएको छ । अहिले उद्योगले वार्षिक २० हजार टन धागो उत्पादन गर्दै आएको छ । ७५ करोड रुपैयाँ लगानीमा वर्षिक ८ हजार टन धागो उत्पादन थप्न लागेको ग्रुपका अध्यक्ष विष्णुप्रसाद न्यौपानेले बताए ।

‘बैंकबाट ऋण नलिइ कम्पनीको आम्दानी र रिजर्भबाट थप लगानी गर्ने भएका छौं । क्षमता विस्तारपछि उद्योगको उत्पादन ४० प्रतिशत बढ्ने छ ’ अध्यक्ष न्यौपानेले सुनौलो नेपालसँग भने ।

उद्योगको धागो उत्पादन क्षमता विस्तार सुरु भइसकेको छ । मेशिन अर्डर गर्ने काम भइसकेको उनले जानकारी दिए । ढिलोमा डेढ वर्षभित्र उद्योगको क्षमता विस्तारको काम सकिने छ । उद्योग वीरगञ्जमा छ ।

विदेशमा धागोको माग बढेपछि उद्योगले उत्पादन क्षमता बढाउन सुरु गरेको हो । धागोको मुख्य बजार भारत नै हो । टर्कीमा पनि निर्यात भइरहेको छ । जगदम्बाले अहिले बंगलादेशमा धागो निर्यातका लागि कोशिस गरिरहेको छ । परीक्षणका रुपमा केही गाडी धागो बंगलादेश निर्यात भएको न्यौपानेले बताए ।

जगदम्बा स्पिनिङ मिल्सको बुकबिल्डिङ विधिबाट प्राथमिक सेयर (आइपिओ) निष्कासन गर्ने भएको छ। चुक्तापुँजीको १० प्रतिशतसम्म आइपिओ निष्कासन गर्ने योजना ग्रुपको छ । ढिलोमा आगामी आर्थिक वर्षभित्र जगदम्बाको आइपिओ निष्कासन भइसक्ने ग्रुपका अध्यक्ष न्यौपानेले बताए।

उद्योगको गत पुस २६ मा सम्पन्न साधाणसभाबाट सर्वसाधारणलाई सेयर जारी गर्ने प्रस्ताव पारित गरिसकेको छ ।

जगदम्बा स्पिनिङ मिल्सले २०२३ को ९ महिनामा पौने ३ अर्ब रुपैयाँको धागो व्यापार गरेको छ । जगदम्बाले भारत र टर्कीमा धागो निर्यात गरेर ९ महिनामा २ अर्ब ७८ करोड ३० लाख रुपैयाँ सञ्चालन आम्दानी गरेको हो ।

२०२२ मा जगदम्बाले २ अर्ब ३२ करोड ८० लाख रुपैयाँको धागो व्यापार गरेको थियो । गत वर्षको भन्दा ९ महिनामा उद्योगको धागो व्यापार बढी देखिएको छ । २०२१ मा १ अर्ब ५६ करोड ४० लाख, २०२० मा १ अर्ब २७ करोड ६० लाख र २०१९ मा २ अर्ब १७ करोड २० लाख रुपैयाँको धागो व्यापार गरेको थियो ।

पाँच वर्षको विवरण हेर्दा उद्योगको धागो व्यापार बढ्दै गएको देखिन्छ। जगदम्बाले पलिस्टर धागो, पोलिस्टर भिस्कोज मिश्रित धागो र एक्रिलिक जस्ता फाइबरमा आधारित धागो उत्पादन गर्दछ ।

उद्योगले कूल उत्पादनको ९२ प्रतिशत भारत र टर्कीमा निर्यात गर्दै आएको छ । उद्योगको आम्दानी निर्यातमा आधारित छ । यो वर्ष कूल आम्दानीको ९३.४ प्रतिशत र अघिल्लो वर्ष ९२.१ प्रतिशत आम्दानी निर्यातबाट भएको छ ।

जगदम्बाले ३ अर्ब ८ करोड रुपैयाँ ऋणको रेटिङ गराएको छ ।

२००५ मा स्थापना भएको जगदम्बा स्पिनिङ मिल्स २०२१ मा आएर आइपिओ निष्कासन गर्न पब्लिक लिमिटेड कम्पनीमा रुपान्तरण भएको हो ।

उद्योगका प्रमोटरहरूसँग उत्पादनमा २५ वर्षभन्दा बढी अनुभव छ । सौरभ समूहको सिमेन्ट र स्टिल जस्ता धेरै ठूला उद्योगहरूमा लगानी छ । समूहले लगानी विविधिकरण गरी चिया, धागो र सिंथेटिक बुनेका कपडाको उत्पादन गरिरहेको छ । ग्रुपले भर्खरै सर्वोत्तम सिमेन्ट लिमिटेडको आइपिओ निष्कासन गरेको छ ।