काठमाडौँ । ट्रेकिङ एजेन्सिज एसोसिएसन अफ नेपाल (टान) ले नेपालको सगरमाथालाई विश्वमाझ चिनाउन योगदान दिएका हलिउड फिल्म निर्माता तथा छायांकार डेभिड ब्रेसियर्सको निधनले  नेपाललाई अपूरणीय क्षति पुगेको  जनाएको छ ।

टानका महासचिव बिनोद सापकोटाले नेपालको प्राकृतिक सुन्दरतालाई फिल्ममार्फत बिश्वसामु पुर्याएका डेभिड खेलेको भुमिका अतुलनीय  रहेको भन्दै उनको निधनले नेपाललाई ठुलो क्षति पुगेको जनाएका हुन ।

सगरमाथा  आरोही समेत रहेका उनले पाँच पटक सगरमाथा आरोहण गरेका  थिए । सन् २०१५ मा रिलिज भएको हलिउड फिल्म ‘एभरेस्ट’ थ्रीडीका उनी सहायक निर्माता र दोस्रो तहका छायांकार थिए ।

सन् १९८३ मा उनी सगरमाथाबाट ‘लाइभ टेलिकास्ट’ गर्ने पहिलो व्यक्ति बनेका  हुन  । सन् १९९८ को आइम्याक्स डकुमेन्ट्री ‘एभरेस्ट’बाट उनी विश्वचर्चित बने । आइम्याक्स डकुमेन्ट्री इतिहासमा   सर्वाधिक धेरै कमाउने फिल्म बन्यो । आठ फिल्ममा काम गरेका उनले सगरमाथामाथि एभरेस्ट, स्टोर्म ओभर एभरेस्ट र एभरेस्ट डेथ जोनजस्ता फिल्म निर्माण  गरेका छ्न ।

ब्रेसियर्सको निधनमा नेपाली फिल्मकर्मी र पर्वतारोही समुदायले समेत  दुःख व्यक्त गरेका छन् ।

अमेरिकाको म्यासाचुसेट्समा ६८ वर्षीय ब्रेसियर्स घरमा मृत फेला  परेका थिए । उनको मृत्युको ठोस कारण भने यकिन नभएको  परीवारले   उल्लेख  गरेको छ  ।