काठमाडौं । नेकपा (एकीकृत समाजवादी) ले पार्टीको आसन्न राष्ट्रिय महाधिवेशनमा पेश हुने राजनीतिक प्रतिवेदनसहितका मस्यौदामाथि आन्तरिक छलफल शुरु गरेको छ ।

शनिवारबाट काठमाडौंको आलोकनगरस्थित पार्टी मुख्यालयमा शुरु भएको पार्टी स्थायी कमिटी बैठकमा अध्यक्ष माधवकुमार नेपालले राष्ट्रिय महाधिवेशनका लागि तयार पारेको राजनीतिक प्रतिवेदनको मस्यौता प्रश्तुत गरेका हुन् ।

त्यसैगरी सम्मानित नेता झलनाथ खनालले पार्टीको समाजवादी कार्यक्रम, महासचिव घनश्याम भुसालले सांगठानिक प्रतिवेदन, उपाध्यक्ष डा.वेदुराम भुसालले विधान संशोधन प्रतिवेदनको मस्यौदा बैठकमा प्रश्तुत गरेको पार्टीका प्रवक्ता जगन्नाथ खतिवडाले जानकारी दिए । उनका अनुसार भोली (आईतवार) प्रश्तुत प्रतिवेदनहरुमाथि स्थायी कमिटीका सदस्यहरुले सुझाव दिनेछन् ।

प्रवक्ता खतिवडाले भने, ‘हाम्रो पार्टीको स्थायी कमिटीको बैठक आज शुरुवात भयो । हामीले बनाएको कार्यतालिका अनुसार आज बैठक सक्नुपर्नेमा छलफलको क्रम नसकिएको हुनाले भोलि पनि यो स्थायी कमिटीको बैठक चल्नेछ । आज बैठकमा पार्टी अध्यक्षले महाधिवेशनमा प्रस्तुत गर्ने राजनीतिक प्रतिवेदनको मस्यौदा प्रश्तुत गर्नुभयो ।

महासचिव घनश्याम भुसालले संगठनात्मक प्रस्ताव प्रश्तुत गर्नुभयो । त्यो पनि मस्यौदा थियो । र विधान संशोधनमा आवश्यक पर्ने कुराको लागि बनाइएको मस्यौदा प्रस्ताव पनि संगठन विभाग प्रमुख पार्टीका उपाध्यक्ष वेदुराम भुसालले प्रश्तुत गर्नुभयो । र हाम्रो आगामी कार्यक्रम अर्थात पार्टीको समाजवादी कार्यक्रम त्यो कार्यक्रम प्रश्तुत गर्नुभयो कमरेड झलनाथ खनालले ।

आज कार्यपत्रहरु बाँडिएको छ । दस्तावेजहरु । यसमा स्थायी कमिटीका सदस्यहरुले भोलि ११ बजेदेखि छलफल गर्नुहुनेछ । उहाँहरुको सुझाव संकलन गर्दै हामीले भोलीको सट्टा पर्सी पोलिटव्युरो बैठक बस्नेछौं । केन्द्रिय कमिटी बैठक पनि एक एक दिन पछि सर्दै गएको छ ।’

नेकपा एसको राष्ट्रिय महाधिवेशन आगामी असार १६ देखि २० गतेसम्म काठमाडौंमा हुँदैछ । सोही महाधिवेशनमा प्रश्तुत हुने प्रतिवेदनको मस्यौदामाथि पार्टी भित्र छलफल शुरु गरिएको हो ।

स्थायी कमिटीका सदस्यहरुले आईतवार छलफल गरेपछि सोमवार बोलाइएको पोलिटब्युरो बैठक र त्यसलगत्तै बस्ने केन्द्रिय कमिटी बैठकले दिएको सुझावको आधारमा त्यसलाई पूर्णता दिने पनि प्रवक्ता खतिवडाले बताए ।