काठमाडौं । प्रमुख प्रतिपक्ष दल नेपाली कांग्रेसका नेता डा. शेखर कोईरालाले आफ्नो पार्टीले उपप्रधानमन्त्री तथा गृहमन्त्री रवि लामिछानेलाई संसदमा बोल्न नदिएको भन्नेकुरा गलत भएको दाबी गरेका छन् ।

नेपाल लोकतान्त्रिक वैदेशिक रोजगार व्यवसायी एशोसिएशनले शनिवार काठमाडौंमा आयोजना गरेको एक कार्यक्रममा बोल्दै उनले उपप्रधानमन्त्री लामिछानेलाई संसदमा बोल्न नदिएको आरोप लगाईरहँदा कांग्रेसले बोल्न दिने कुरामा सहमत भएको जिकिर गरेका हुन् ।

उनले बोलेको कुरामा चित्त नबुझे खण्डन गर्ने कांग्रेसको अडान पनि बोल्न नचाहेको नेता कोईरालाको भनाई थियो । उनले उपप्रधानमन्त्री लामिछानेले सहकारी ठगीमा मुछिएपछि गृहमन्त्री भएर बस्न नमिल्ने बताए । उपप्रधानमन्त्री भए फरक नपर्ने तर गृह मन्त्रालयमा बस्न भने उनले नमिल्ने नेता कोईरालाले बताए । उनले उपप्रधानमन्त्री लामिछाने आफैले संसदमा उभिएर आफूमाथि लागेको सहकारी गठी छानविनका लागि संसदीय समिति बनाउनुपर्ने धारणा राख्नुपर्ने बताए ।

नेता कोईरालाले भने, रवि लामिछानेजीको इस्यूलाई पनि अलिकति कुरा तपाईहरुले पनि बुझाउनुपर्नेछ । साथीहरुले धेरै ठाउँमा धेरै कुरा भन्नु भएको छ । तपाईहरुत कस्तो डेमोक्रेटिक पार्टी हो बोल्न पनि दिनुहुन्न भनेर भन्नुहुन्छ । हामीहरुले बोल्न नदिएको होइन रविजीलाई । बोल्नुस् भनेर भनेकै हो हामीहरुले । तर हामीहरुले के भनेको थियौ भने तपाईले बोलिसकेपछि हामीलाई चित्त बुझ्यो भने हामी बस्छौं । होइन भने हामी तपाईले बोलेको बोलीको खण्डन गर्छांै भनेर भन्दा त्यो स्वीकार्य भएन । अब के गर्ने ? हामीहरुले राजीनामा पनि मागेको छैन । राजीनामा हामी भन्दैनौं ।

हामी त के भन्छौँ भने उहाँ सरकारमा नभएको भए, त्यो पनि गृहमन्त्री नभएको भए हामी केही पनि गर्दैन थियौ होला । किनभने सहकारी त यो तल्लो तप्काका मानिसहरुले पैसा जम्मागरी सहकारीमा राखेर त्यो रकम अपचलन भएको हो नि त । जनताले सडकमा उठाएका मागहरुलाई हामीहरुले सदनमा ल्याइ दिएको हो । हामी राजीनामा मागिराखेका छैनौं रविजीको । हामी के भन्दैछौ भने निष्पक्ष छानविन अब देशभरको छानविन त सांसदले गर्ने होइन होला ।

रवि लामिछानेजीलाई जुन कुराको चार्ज लगाएका छन । त्यो कुरा होइन भनेर उहाँले पुष्टि गरिदिनु पर्यो । त्यो पुष्टि हुनका लागि उहाँले मन्त्री नै हुनुहोस् । उपप्रधानमन्त्रीनै बसिरहनु होस् । तरतर गृह मन्त्रालयमा त बस्नु भएन नि उहाँले । गृह मन्त्रालयका बसेर सिआईवीले कसरी छानविन गर्छ ? र देशभरीको सहकारीलाई सरकारले छानविन गर्ने भनेको सरकारको निकायहरुले छानविन गर्ने हो । नेपाली कांग्रेस, एमाले, माओवादी वा सांसदहरुले छानविन गर्ने त होइन होला । त्यो रविजीले गरेको हो, होइन ? हामी हो भन्छौँ, उहाँ होइन भन्न हुन्छ । त्यति न हो । अब बोल्न दिने क्रममा जनार्दनजीले म बोल्छु भन्दा एमालेले नमानेको हो नि ।

सत्ता पक्षले जे गर्दैछ, त्यो गलत हो । कसैको बारेमा प्रश्न उठेपछि म क्लिन हुन्छ भने भईहाल्छ, त्यसमा के फरक पर्छ ? मैले यो कुरा किन भनिराखेको छु भने लोकतान्त्रिक पार्टीले उहाँलाई बोल्न दिएन भन्ने जुन आईराखेको छ । त्यो कुरा गलत हो । तपाई बोल्नुस् हामीलाई चित्त बुझयो भने ठिक । केही पनि भन्दैनौं । उहाँले नै बोलेर छानविन समिति बनाउनु भनिदिए त सकियो कुरा । तर हामीलाई चित्त बुझेन भने हामी बोल्छौं । यो कुनै गलत नेपाली कांग्रेसले उठाएको छैन ।’

नेता कोइरालाले कांग्रेसले उपप्रधानमन्त्री लामिछानेको राजीनामा नमागेको पनि बताए ।