काठमाडौं । निजी क्षेत्रको गुड कर्मा ग्रुप अफ कम्पनिज प्राइभेट लिमिटेडले राजधानीको महाराजगन्जमा लक्जरी अपार्टमेन्ट ‘कर्मा रेजिडेन्स’ बनाइरहेको छ ।

अहिलेसम्म कर्मा रेजिडेन्सको ४० प्रतिशत काम सकिएको छ । आगामी सन् २०२६ को पहिलो त्रैमाशमा रेजिडेन्स निर्माण सकेर हस्तान्तरण गर्ने लक्ष्य कम्पनीको छ ।

वन बिल्डर्सले अपार्टमेन्टको सिभिल, मेसिनरी, इक्विपमेन्ट र प्लम्बिङ कामको जिम्मेबारी पाएको छ । गुड कर्माले कूल ५ अर्ब ६५ करोड ८० लाख रुपैयाँ लगानीमा लक्जरी आपर्टमेन्ट निर्माण थालेको हो ।

यसअघि ४ अर्ब ७९ करोड ९० लाख रुपैयाँ लगानी हुने अनुमान गरिएको थियो । यसबीचमा १८ प्रतिशत झण्डै ८६ करोड रुपैयाँ लागत बढेको छ ।

जग्गा खरिद, निर्माण र विकास लागत थप हुँदा यसको असर कूल लगानीमा परेको गुड कर्माले जनाएको छ । १ सय ६२ वटा लक्जरी अपार्टमेन्ट रहने भएको छ ।

१ सय ६२ अपार्टमेन्टमध्ये ३२ वटा अपार्टमेन्ट होटलमा परिणत भएका छन् । अहिलेसम्म ५३ युनिट बुक भइसकेको कम्पनीले जनाएको छ । गुडकर्माले ६८ करोड ५० लाख रुपैयाँ ५३ युनिट अपार्टमेन्ट बुकबाट प्राप्त गरेको छ ।

जसले गर्दा अपार्टमेन्टलाई लगानीयोग्य पुँजीमा सहज भएको छ । गुडकर्माले १ अर्ब ९५ करोड रुपैयाँ ऋणको रेटिङ गराएको छ ।

रेजिडेन्सीमा ६० प्रतिशत बैंक र बाँकी ४० प्रतिशत स्वपुँजी (इक्विटी) स्वामित्व हुने गरी लगानी संरचना बनाइएको छ । निर्माणधिन अपार्टमेन्टको ३ वटा विङस रहने भएको छ । ए, बि र सि हुनेछ । जसमा २.५ र ३.५ बिएचके अपार्टमेन्ट रहेका छन् ।

निर्माणधीन रेजिडेन्सीमा अमेरिकी, सउदी अरेबिया र अष्ट्रेलियाको दूतावासभन्दा ३०० मिटर टाढाको दूरीमा रहेको छ ।

गु्रपले मेरियटको नयाँ फ्रेन्चाइजी ‘ले मेरिडियन’ पाँचतारे होटल पनि निर्माण गर्न लागेको छ । होटल परियोजनाका लागि मेरियटसँग सम्झौता गरेको छ ।

कम्पनीले होटलसँगै रेसिडेन्सियल लक्जरी अपार्टमेन्ट पनि निर्माण गर्न लागेको हो । यससँगै गुडकर्मा होटल तथा अपार्टमेन्ट व्यवसायमा प्रवेश गरेको छ ।

हाल उक्त होटल तथा अपार्टमेन्टको कन्सेप्ट तथा डिजाइन निर्माणको काम सम्पन्न भइसकेको छ । भारतमा धेरै ओटा मेरियट होलटहरूको डिजाइन र कन्सेप्टमा काम गरिसकेको नायक एण्ड एसोसिएट्सले डिजाइन तयार गरेको हो ।

प्रस्तावित मेरिडियन होटलमा १ सय ७० रुम, एउटा क्यासिनो, एउटा बार, दुइटा रेस्टुराँ, एउटा रुफटप डाइनिङ र एउटा बैंक्वेट हुनेछन् । गुड कर्माको एकल लगानी र सञ्चालनमा निर्माण हुन लागेको होटल र अपार्टमेन्ट परियोजनामा ६ अर्ब रुपैयाँ लगानी हुने अनुमान गरिएको छ । जसमा होटलतर्फ ४ अर्ब ५० करोड र अपार्टमेन्टको मूल्य १ अर्ब ५० करोड रुपैयाँ रहनेछ ।

मेरियटको फ्रेन्चाइजी अन्तर्राष्ट्रिय स्तरको पाँचतारे होटल ले मेरिडियनसँगै रहने उक्त अपार्टमेन्ट लक्जरी रेसिडेन्सियल अपार्टमेन्ट हुने र यसको प्रतियुनिट ३ देखि ५ करोड रुपैयाँसम्म पर्ने बताइएको छ ।

शिक्षा, ट्रेक कम्पनी टु दी हिमालयजको सफलतापछि गुड कर्माले लगानी विविधिकरण गरी दायरालाई नयाँ ढंगले विस्तार गर्न यो व्यवसायमा प्रवेश गरेको हो । कर्मा रेजिडेन्सको स्थापना २०२० मा भएको हो ।

यो पनि :

५ अर्ब ६५ करोड लगानीमा महाराजगञ्जमा लक्जरी अपार्टमेन्ट बनाउँदै गुडकर्मा ग्रुप