काठमाडौं । एलिट मर्चेन्ट क्यापिटल लिमिटेडले हकप्रद सेयर निष्काशन गरेको छ । कम्पनीले आगामी असार ५ गतेसम्म हकप्रद सेयरका लागि आवेदन दिन सेयरधनीहरुका नाममा सार्वजनिक सूचना जारी गरेको छ ।

हकप्रद सेयर संस्थापकहरुका लागि मात्र निष्काशन गरिएको कम्पनीले जनाएको छ । एलिटले १००ः२५ अर्थात २५ प्रतिशत हकप्रद निष्काशन गरिएको जानकारी दिएको छ । यदी कुनै संस्थापकले हकप्रद लिन नचाहेमा मात्रै विद्यमान अन्य सेयरधनीले खरिद गर्न पाउनेछन् ।

यो हकप्रद निष्काशनपछि एलिट क्यापिटलको चुक्ता पुँजी २२ करोड ५० लाख रुपैयाँ पुग्ने भएको छ । हकप्रदपछि संस्थाको जारी पुँजी २८ करोड १२ लाख रुपैयाँको २० प्रतिशत सेयर सर्वसाधारणलाई आइपिओमार्फत बिक्री गरिने योजना क्यापिटलले बनाएको छ ।

नेपाली व्यवसायी, गैरआवासीय नेपाल, सेयर बजारका लगानीकर्ता, बैंकर्स र उद्यमीहरुको प्रयासमा स्थापित एलिट क्यापिटलले बिभिन्न मर्चेन्ट बैंकिङ सेवाहरु दिइरहेको छ । पोर्टफोलियो मेनेजमेन्ट, कर्पोरेट एडभाईजरी, अण्डरराईटिङ तथा डिम्याट सेवा प्रदान गरिरहेको छ ।

क्यापिटलले प्राईभेट ईक्विटी तथा भेन्चर क्यापिटलको रुपमा पनि काम गर्ने तयारी गरिरहेको संस्थाका कार्यकारी अध्यक्ष दिनेश आचार्यले जानकारी दिए । मर्चेन्ट बैंकिङसम्बन्धि पूर्ण सेवा दिने क्रममा एलिट क्यापिटलले बिक्री प्रबन्धक र सेयर रजिष्टारको सेवा पनि दिने तयारी गरेको छ । तर, धितोपत्र बोर्डले बिक्री प्रबन्धक र शेयर रजिष्टारको ईजाजतपत्र दिन रोकेको लामो समय भैसकेका कारण सेवा दिन नसकिएको क्यापिटलले जनाएको छ ।

एलिट क्यापिटलले व्यक्तिगत तथा संस्थागत पोर्टफोलियो मेनेजमेन्ट सेवामा सबैभन्दा सस्तो शुल्कमा सेवा दिइरहेको छ । नाफामा भागबण्डा हुने पर्फमेन्ट शुल्क पनि सबैभन्दा कम लिने गरेको छ । यसले १५ बर्ष लामो दीर्घकालिन लगानीका स्किमदेखि छोटो लगानी स्किमहरु सञ्चालन गरिरहेको छ ।