सनत हमाल
मुगु । मुगु जिल्लामा अवस्थित एक प्राकृतिक र सुन्दर ताल हो रारा । यो तालले आफ्नो अनौठो र विशिष्ट सौन्दर्यका कारण पर्यटकहरुको मनलाई मोहनी लगाउँछ । तर, कहिलेकाहीँ सोचिएको र वास्तविकतालाई तुलना गर्दा केही फरक छ रारामा ।
हिजो आज राराताल आन्तरिक पर्यटकको प्रमुख आकर्षणको मुख्य गन्तव्य बन्दै जान थालेको छ ।

रारा तालको सुन्दरताको व्याख्या एकै मौसमले नपुग्ने रहेको छ । रारा तालको वास्तविकता सोचिएको भन्दा फरक भए पनि यसको अनौठो र मनमोहक सौन्दर्यले सबैलाई मोहित पार्ने गरेको छ । यसको प्राकृतिक सुन्दरता र शान्त वातावरणले यहाँ आउने जो कोहीको मन जित्ने गरेको छ ।

जेठको अन्तिम सातादेखि साउनको पहिलो सातासम्म रारा ताललाई फूलै फूलले ढपक्क ढाक्ने गरेको छ । फोटो भिडियोमा देखेको रारालाई आफुले प्रत्यक्ष नियाल्दा सुन्दर अनि अनौठो महसुस गरेको रारा घुम्न आएकी काठमाडाँैकी सिता दुवाडीले बताईन । उनले भनिन, “रारासँग अनेकौँ सुन्दरता रहेछ, फोटोमा देखेको भन्दा झने राम्रो र मनमोहक रहेछ रारा । यस्को सुन्दरताको ब्याख्या गर्न नै सकिन मैले ।”

रारा तालको प्राकृतिक सौन्दर्य अद्वितीय रहेको छ । तालको शान्त पानी, वरिपरिका हरियाली जंगलहरु, हिमालयन दृश्यहरु, र जैविक विविधता अद्भुत रहेका छन् । जब रारा जाने योजना हुन्छ तब बाटोको असहजताले यात्रामा पाउने दुःख कष्टको कल्पना हुन्छ ।

जब दुख कष्ट सहेर रारा पुगिन्छ तब सम्पुर्ण दुख कष्ट बिर्साउछ राराले एउटा स्वर्गको टुक्राझै लाग्ने राराको हामीले बयान गर्ने कुनै शब्द नै नभएको रारा घुम्न आएका पर्यटकहरु बताउछन् । यति सुन्दर तथा मनमोहक एवं आन्तरिक तथा बाह्यि पर्यटकहरुको मुख्य आकर्षणको केन्द्र रहेको यो ठाउँ अझै राज्यको उपेक्षामा परेको आन्तरिक पर्यटक दीपक पाण्डेले बताए ।

उनले भने, “स्वर्गको टुक्रा झै रहेको रारालाई अझै राज्यले चिन्न सकेन, जो आफैमा दुःख लाग्दो कुरो हो ।” रारा ताल समुन्द्री सतहबाट दुई हजार नौ सय ९० मिटर उचाइमा रहेको छ । रारा राष्ट्रिय निकुञ्जमा ५१ प्रजातिका स्तनधारी जनावर र दुई सय ७२ प्रजातिका चराचुरुंगी पाइन्छन् ।

रारा ताल जानका लागि वर्षभरि नै उपयुक्त भए पनि हिउँले ढाकेको रारा र फूलैफूलले ढाकेको रारा हेर्नका लागि धेरैजसो आन्तरिक पर्यटक आउने गदर्छन् ।

रारा तालको पूरा आकृति हेर्नका लागि समुद्री सतहबाट करिब चार हजार मिटर उचाइमा अवस्थित मुर्मा टप नै उपयुक्त स्थल रहेको स्थानीयवासीहरु बताउछन् ।