काठमाडौं । आइएमई समुहको हाइड्रो सपोर्ट प्रालिले बनाउन लागेको ६६.३ मेगावाटको मध्य कालीगण्डकी जलविद्युत आयोजनालाई लगानी जुटेको छ । आयोजनाको वित्तीय व्यवस्थापन गर्न सहवित्तीयकरणका बैंकहरू र प्रवद्र्धक कम्पनीले ऋण सम्झौतामा हस्ताक्षर गरेका छन् ।
सम्झौतामा हाइड्रो सपोर्ट प्रालिको तर्फबाट आइएमई समुहका अध्यक्ष चन्द्रप्रसाद ढकाल र लिड बैंक नबिल बैंकका प्रमुख कार्यकारी अधिकृत (सइओ) ज्ञानेन्द्र ढुङ्गानाले हस्ताक्षर गरेका हुन् । आयोाजना म्याग्दी जिल्लाको अन्नपूर्ण गाउँपालिका कालीगण्डकी नदीमा निर्माण गर्न लागिएको हो ।
सहवित्तीयकरणका बैंकहरूको अगुवाइ नबिल बैकले गरेको छ । अन्य सहभागी बैकहरूमा एभरेष्ट बैक, नेपाल इन्भेष्टमेन्ट मेगा बैंक, नेपाल बैंक, राष्ट्रिय वाणिज्य बैंक र प्रभु बैक रहेका छन् । निर्माण अवधिको ब्याजबाहेक १२ अर्ब ९३ करोड रुपैयाँ अनुमानित लागत रहेको आयोजनामा ७५ प्रतिशत ऋणबाट र २५ प्रतिशत स्वपूँजी (इक्विटी)बाट जुटाइएको छ । इक्विटीमा आइएमक्ष्ए समुह र सर्वसाधारणको लगानी रहने छ।

सहवित्तीयकरणका बैकहरूले आयोजनामा निर्माण अवधिको ब्याजसहित ११ अर्ब १२ करोड रुपैयाँ ऋण लगानी गर्ने छन् । कुल ऋणमध्ये नबिल बैंकको ३ अर्ब १२ करोड, एभरेष्ट बैक र नेपाल इन्भेष्टमेन्ट मेघा बैंक प्रत्येकले २ अर्ब र नेपाल बैक, राष्ट्रिय वाणिज्य बैक र प्रभु बैक, प्रत्येकले १ अर्ब रूपैयाँ रहने छ । मध्य कालीगण्डकी जलविद्युत आयोजनाको निर्माण सन् २०२४ बाट सुरु भई ४ वर्ष भित्रमा सम्पन्न गर्ने लक्ष्य राखिएको छ ।

नेपाल विद्युत प्रधिकरणसँग विद्युत खरिद बिक्रि सम्झौता हुँदा हिउँदयामको विद्युत खरिद दर ८.४० रुपैयाँ र वर्षायामको दर ४.८० रुपैयाँ कायम भएको आधारमा आयोजनाबाट हिउँदमा १३ करोड युनिट बिजुली बिक्रीबाट १ अर्ब ९ करोड रुपैयाँ आम्दानी हुने कम्पनीले जनाएको छ ।

यस्तै वर्षामा २७ करोड युनिटबिक्रीबाट १ अर्ब ३३ करोड रुपैयाँ आम्दानी भई वार्षिक कुल ४० करोड ७० लाख युनिट विद्युत उत्पादनबाट कूल २ अर्व ४२ करोड रुपैयाँ आम्दानी हुने छ । हालसम्म आयोजना निर्माण तयारीका कामहरु भइरहेका छन् ।