काठमाडौं । नेपाल भलिबल संघले इन्फिनिटी ड्रिम्स प्रालिलाई एभरेस्ट महिला भलिबल लिग सञ्चालन गर्न स्वीकृति दिएको छ । महिला भलिबलको क्षेत्रलाई अन्तर्राष्ट्रिय मापदण्डमा उकास्ने अवसरका रुपमा लिइएको बताइएको छ ।

नेपाल भलिबल संघका अध्यक्ष जितेन्द्रबहादुर चन्दले इनफिनिटी ड्रिम्स प्रालिलाई नेपाल भित्र ७ वर्षको लागि एभरेस्ट महिला फ्रेन्चाइज भलिबल लिग आयोजना गर्न अनुमति प्राप्त गरेकोमा बधाई दिए । इनफिनिटी ड्रीम्स प्रालिले होम र अवे सिद्धान्तको अवधारणा अनुसार देशभर यो लिग आयोजना गर्न अधिकार पाएको हो ।

देशका महिलाहरुलाई भलिबलमार्फत सशक्त बनाउने कार्यमा सँगै काम गर्न यसले सहयोग पुग्ने बताए । लिगको उद्देश्य राष्ट्रिय र अन्तर्राष्ट्रिय क्षेत्रहरूमा भलिबलको स्तर विकास गर्नु र भलिबलमा व्यवसायिकता ल्याउनु रहेको संघले बताएको छ ।

लिगले भलिबलप्रति युवा भलिबल खेलाडीहरुलाई राष्ट्रिय स्तरमा आकर्षित गर्ने र अन्तर्राष्ट्रिय स्तरको प्रतियोगिताहरुमा उनीहरुलाई प्रदर्शन गर्ने ठूलो प्लेटफर्म हुने बताए । यो कार्यक्रमले नेपालको खेलकुद पर्यटनमा पनि टेवा पर्याउने विश्वास लिइएको छ ।