कैलाली । नेकपा एमालेका सांसद तारा लामा तामाङले कञ्चनपुरको बाढी र कटान रोक्न उपप्रधान तथा अर्थमन्त्री विष्णु पौडेलको ध्यानाकर्षण गराएका छन् । उनले अर्थमन्त्री पौडेललाई एक माग पत्र बुझाउँदै जिल्लाको दिगो समस्या समाधानका लागि पर्याप्त बजेट विनियोजन गर्न आग्रह गरेका हुन् ।

कञ्चनपुर प्रतिनिधि सभा क्षेत्र नम्बर १ बाट निर्वाचित एमाले सांसद तामाङले कञ्चनपुरको दोदा, चौधर र महाकालीलगायतका नदीहरुले बर्षातको समयमा कञ्चनपुरका दर्जनौँ बस्तीहरू प्रभावित हुने गरेको बताए । असार २२ देखि २४ सम्मको मनसुनको कारण कञ्चनपुरमा मात्रै चार जनाको मृत्यु भएको बताउँदै उनले यहाँका सयौँ बिघा खेतीयोग्य जग्गा बगरमा परिणत भएको र सयौँ घरहरूमा क्षति पुगेको बताए ।

तामाङले अर्थमन्त्री पौडेललाई फेरि यस्तो नियति नदोहोरिन भन्दै तत्काल उपयुक्त व्यवस्था गर्न माग गरे । उनले चौधर नदी मा गुरुयोजना अनुसारको पक्की तटबन्ध निर्माण गर्न माग गरे ।

बोर्डर करिडोर सडक (बीचफाँटा पुनर्वास,गोविन्द बजार बेलौरी छोटी भन्सार, बैवाह हुँदै झिलमिला सम्म) र बेलौरी भन्सार सिमा देखि बेलौरी बजार हुँदै कलुवापुरसम्म सडक स्तरोन्नति गर्न पनि सांसद तामाङले माग गरेका छन् ।

सांसद तामाङको माग पत्र बुझ्दै उपप्रधान तथा अर्थमन्त्री विष्णु पौडेलले आफू समस्याको समाधान गर्न लाग्ने बताए ।