काठमाडौं । सेयर बजार बढ्दै गएपछि लगानीकर्तामा उत्साह थपिएको छ । नेपाल स्टक एक्सचेन्ज (नेप्से) सूचक २५ सय अंकको रेखामाथि पुगेको छ । बजार बढ्दा नेप्से सूचक झनै फराकिलो भएको छ । मंगलबार सेयर बजार ७५.३३ अंक बढेर नेप्से सूचक २५ सय ६३.४३ अंकमा पुगेको छ ।

मंगलबार नेप्से सूचक २८ महिनायता उच्च विन्दुमा पुगेर बन्द भएको छ । २०७८ चैत १६ गते नेप्से सूचक २५ सय ६८.२५ विन्दुमा बन्द भएको थियो । लगानीकर्ताको विश्वास बढ्दा सेयर बजारमा आक्रामक वृद्धि देखिएको हो ।

प्रधानमन्त्री केपी शर्मा ओलीले पनि संघीय संसदलाई सम्बोधन गर्दै सेयर बजार बढ्छ भन्ने सकरात्मक सन्देश दिएका थिए । यसको असर पनि बजारमा परेको अनुमान छ ।

प्रधानमन्त्री ओली, अर्थमन्त्री विष्णु पौडेल र राष्ट्र बैंकका गभर्नर महाप्रसाद अधिकारीले सार्वजनिक कार्यक्रमहरुमा मौद्रिक नीति खुकुलो आउने बताइसकेका छन् । चालू आर्थिक वर्षको मौद्रिक नीति सेयर बजारमैत्री हुने अनुमानसहित लगानीकर्ताको छ ।

यस्तै नेपाल राष्ट्र बैंकले चालू आर्थिक वर्षको मौद्रिक नीति पनि ल्याउँदै छ । मौद्रिक नीति कस्तो आउला भन्ने कौतुहल सेयर लगानीकर्तामा छ । यसले पनि बजारमा लगानीकर्ताको मनोविज्ञानमा सकरात्मक प्रभाव परेको छ । मौद्रिक नीति बजारमैत्री आएन भने सेयर बजार फेरी ओरालो लाग्ने संभावना उत्तिकै छ ।

बजार बढेपछि मंगलबार १४ अर्ब ११ करोड ६३ लाख रुपैयाँभन्दा बढीको सेयर कारोबार भएको छ । यस दिन सबै समूहका सूचक बढेका छन् । बिमा समूहहरुमा बढी उत्साह देखिएको छ भने ५ कम्पनी सकारात्मक सर्किट लागेको छ । आजको कारोबारमा सबै समूहका उपसूचक हरियो देखिँदा सबैभन्दा धेरै व्यापार समूहको उपसूचक पाँच दशमलव ०६ र जीवन बीमा समूहको उपसूचक चार दशमलव ४५ प्रतिशतले बढेको छ ।

मंगलबार बोटलर्स नेपाल लिमिटेड, समृद्धि फाइनान्स कम्पनी लिमिटेड, माण्डु हाइड्रोपावर लिमिटेड, हाथवे इन्भेष्टमेन्ट नेपाल लिमिटेड, नेपाल वेयर हाउजिङ कम्पनी  र साहस ऊर्जा लिमिटेडकोको सेयर मूल्यमा सर्किट लागेको छ ।

मंगलबार लगानीकर्ता शिवम् सिमेन्ट लिमिटेडमा झुम्मिएको छ । शिवम्को सेयर प्रतिकित्ता ५ सय ८८ रुपैयाँमा २४ करोड ६९ लाख रुपैयाँमा किनबेच भएको नेप्सेले जनाएको छ । यस्तै अपि पावर कम्पनी लिमिटेडको पनि प्रतिकित्ता २ सय ३५.८० रुपैयाँमा २४ करोड २६ लाख रुपैयाँको सेयर किनबेच भएको छ ।

नेप्सेका अनुसार मंगलबार ३ सय १७ कम्पनीको ३ करोड ९७ लाख ९० हजार भन्दा बढी कित्ता सेयर कारोबार भएको छ । सबैभन्दा धेरै शेयर मूल्य गणपति लघुवित्त वित्तीय संस्था लिमिटेडको घटेको छ । गणपतिको शेयर मूल्य पाँच दशमलव ८३ प्रतिशतले घटेको हो ।

२ सय २० कम्पनीहरुको सेयर मूल्य बढ्दा १९ वटाको घटेको छ । यस्तै ३ कम्पनीको सेयर मूल्य स्थिर रहेको छ ।

बैंकमा लगानीयोग्य पुँजी (तरलता) बढेपछि ब्याजदर घटिरहेको छ । ब्याजदर घटे पनि लगानीकर्ताले बैंकबाट ऋण लिएका छैनन् ।

यसअघि बजार निरन्तर घट्दा लगानीकर्ताले बजारबाट खर्बौं रुपैयाँ लगानी गुमाएका थिए । जसका कारण सूचिकृत कम्पनीहरुको भाउ निकै तल्लो विन्दुमा पुग्यो । अहिले बजार निरन्तर बढिरहेकाले लगानीकर्ताले फेरी कमाउन थालेका छन् ।

सूचिकृत कम्पनीहरुको चौथो त्रैमासको वित्तीय रिपोर्ट आउन थालेको छ । कम्पनीहरुको नाफा बढेको रिपोर्ट आयो भने बजार बढ्न सक्नेछ भने यदी घटेमा सेयर बजार पुनः ओरालो लाग्ने संभावना उत्तिकै छ ।