काठमाडौं । निजी लगानीमा निर्माणाधीन चारतारे स्तरको भैरहवा गार्डेन रिसोर्ट आउँदो भदौभित्र व्यवसायिक रुपमा पूर्ण क्षमतामा सञ्चालनमा आउने भएको छ । होटलले गत फेब्रअरीमा ‘सफ्ट लञ्च’ गरेर ३८ कोठा सञ्चालनमा ल्याएको छ । फेब्रुअरीदेखि नै स्विमिङपूल, रेष्टुरेन्ट र कन्फरेन्स हल सञ्चालनमा आइसकेका छन् ।

होटलमा ७२ कोठाको छ । बाँकी ३४ कोठाका साथै ब्याँकवेट र क्यासिनो पूर्वाधार निर्माण भइरहेको भैरहवा गार्डेनले जनाएको छ । अहिलेसम्म होटलको ८० प्रतिशत वित्तीय प्रगति भएको छ ।

होटलको अनुमानित लागत १ अर्ब २५ करोड १० लाख रुपैयाँ रहेको छ । ७५ प्रतिशत बैंकको ऋण र बाँकी २५ प्रतिशत संस्थापकको स्वपुँजी (इक्विटी) लगानी हुने भएको छ । भैरहवा गार्डेनले १ अर्ब २ करोड रुपैयाँ बैंकको ऋण लिएको छ । दीर्घकालिन ऋण १ अर्ब र २ करोड रुपैयाँ अल्पकालिन ऋण रहेको होटलले जनाएको छ ।

सफ्ट लञ्च भएको होटलले अहिलेसम्म २ करोड २० लाख रुपैयाँको व्यापार पनि गरेको छ । बाँकी ३४ कोठा, क्यासिनो र ब्याँकवेट सञ्चालनमा आएपछि होटलको व्यापार बढ्नेछ । होटलका एकल सञ्चालक निर्मल श्रेष्ठ हुन् । उनको हस्पिटालिटी र पर्यटन व्यवसायमा तीन दशक लामो अनुभव रहेको छ ।

होटल रुपन्देहीको भैरहवामा रहेको छ । होटल लुम्बिनी क्षेत्रबाट नजिक रहेको छ । यस्तै भारत सीमा ५ किलोमिटर दुरीमा रहेको छ । होटलले भारतीय पर्यटकहरुलाई लक्षित गरी क्यासिनो सञ्चालनमा ल्याउन लागेको हो ।

गुणस्तरीय र टिपिकल खानाको स्वाद दिदै शान्त र मनोरम ठाउँमा पाहुनाको सत्कार गर्ने योजनासहित रिर्सोट सञ्चालनमा ल्याइएको हो । व्यवसायी श्रेष्ठले पाल्पामा होटल द ह्वाईट लेक तथा भैरहवामा होटल द ह्वाईट लोटस चलाइरहेका छन् । श्रेष्ठले सुविधासम्पन्न पर्यटकमैत्री होटल सञ्चालन गर्ने योजनासहित भैरहवा गार्डेन रिसोर्ट निर्माण गरेका हुन् ।

होटलमा एकपटकमा ८५ जनासम्म अट्ने क्षमतासहितको रेष्टुरेण्ट, कफी सपको छुट्टै आउटलेट, पुलबार, २५ जनादेखि १ सय ५० जनासम्म अट्ने छुट्टाछुट्टै कन्फ्रेन्स रुम रहेका छन् । साथै स्वीमिङ पुल, फिटनेश सेन्टर, स्पा एण्ड वेलनेस सेन्टर, साउना र स्टिम वाथको सुविधा पनि रहेको होटलले जनाएको छ ।

होटलमा दक्ष तथा अनुभवी सेफ, विभिन्न स्तरिय होटल तथा हस्पिटालिटी क्षेत्रका अनुभवी कर्मचारी रहेका छन् । होटलमा पर्याप्त पार्किङका साथै ईलेक्ट्रिक गाडीका लागि चार्जिङ प्वाईन्टको व्यवस्था समेत गरिएको छ ।