काठमाडौं । साताको तेस्रो दिन मंगलबार सेयर बजारमा ठूलो ‘करेक्सन’ देखिएको छ । सुरुमा बढ्ने संकेत गरेको बजार बन्द हुँदा १४५ अंक घटेर नेपाल स्टक एक्सचेन्ज (नेप्से) सूचक २६ सय ५१ अंकमा अडिएको छ । सबै समूहका सूचक घटेका छन् । नेप्से घट्न थालेपछि ‘प्यानिक सेल’को अवस्था आए पनि कारोबार रकम झनै बढेको देखिन्छ ।

बजारमा पहिरो गए पनि कारोबार रकमले भने लगानीकर्तामाझ केही आशा जगाएको छ । मंगलबार २३ अर्ब ७१ करोड ६१ लाख रुपैयाँ बराबरको ५ करोड ३८ लाख ४४ हजार २ सय ३७ कित्ता सेयर कारोबार भएको छ । यो कारोबार रकम हालसम्मकै उच्च हो । विश्व सेयर बजार घटिरहेका बेला नेपालको बजारको ग्राफ उकालो लागेको थियो । तर, मंगलबार एकाएक करेक्सन भएको छ ।

बैंक तथा वित्तीय संस्थाहरूले सार्वजनिक गरेको वित्तीय विवरणलाई सामान्य प्रतिक्रिया नदेखाएको सेयर बजार मंगलबार भने एकाएक खस्किनुलाई अर्थपूर्ण रुपमा लिइएको छ ।

यद्यपि, केही समययता लगातार बढेको बजारबाट नाफा बुक गर्नेहरु सक्रिय हुँदा बजारमा आज केही बिक्री दबाब परेको अनुमान गरिएको छ । सेयर क्रेताहरु पनि उत्तिकै देखिएका छन् । किनभने खरिदबिक्री रकम पर्याप्त भइरहेको छ ।

संसदको सोमबारको बैठक विशेष समयमा बोल्दै पूर्वअर्थमन्त्री डा. प्रकाशशरण महतले केही कम्पनीका सेयर मूल्य अस्वभाविकरुपमा बढेको देखिएकाले त्यस्ता कम्पनीको सेयर कारोबारमा बदमासी भएकोबारे नियामकले अनुसन्धान गर्नुपर्ने बताएका थिए । प्रतिनिधिसभाको बैठकमा डा. महतले अहिले पुँजीबजारको वृद्धिलाई स्वभाविक रुपमा लिन नसकिने बताएका थिए । पूर्वअर्थमन्त्रीको भनाइले पनि बजारमा असर परेको हुनसक्छ ।

यस्तै समग्र ट्रेन्ड हेर्दा बजार बढ्ने बाटोमा रहेको देखाउँछ । वित्तीय संस्थामा पर्याप्त तरलता रहेको छ । बैंक ब्याजदर निरन्तर घट्दोक्रममा छ । सरकार तथा नियामक निकाय पुँजी बजार सुधारप्रति प्रतिबद्ध देखिएका छन् । नेपाल राष्ट्र बैंकले नीतिगत अवरोधहरु हटाउँदै गएको छ भने सूचीकृत कम्पनीहरुले नाफाको ग्राफ बढाउँदै लगेका छन् ।

मंगलबार ३ सय २२ कम्पनीको ५ करोड ३८ लाखभन्दा बढी कित्ता सेयर कारोबार भएको छ । ८ कम्पनीको सेयर मूल्य बढ्दा २ सय ३३ कम्पनीको घटेको छ ।

यसदिन हिमायन रि–इन्स्योरेन्स कम्पनी लिमिटेडमा सेयर लगानीकर्ता झुम्मिएका छन् । हिमालयन रिको १ अर्ब ३९ करोड ७८ लाख रुपैयाँको सेयर किनबेच भएको छ । यस्तै नेपाल रि–इन्स्योरेन्स कम्पनी लिमिटेडको ४८ करोड ३६ लाख र सिइडिबी हाइड्रो डेभलपमेन्ट फन्डको ४३ करोड १८ लाख रुपैयाँको सेयर किनबेच भएको नेप्सेले जनाएको छ ।

मंगलबार थ्रि स्टार हाइड्रोपावरको सेयरमा सकरात्मक सर्किट लागेको छ भने कुथुली बखरी स्मल हाइड्रको सेयर सर्किट लभेलमा कारोबार भएको छ । नेपाल फाइनान्स, गोरखा फाइनान्स र सेन्ट्रल फाइनान्सका लगानीकर्ताले गुमाएका छन् ।