काठमाडौं । नेपाल धितोपत्र बोर्डका अध्यक्ष महेश बरालले बोर्डभित्रै धेरै गुटबन्दी हुने गरेकाले काम गर्न समस्याहरु रहेको बताएका छन् ।बिहीबार प्रतिनिधि सभा अन्तर्गतको अर्थ समितिको बैठकमा बोल्दै अध्यक्ष बरालले यस्तो जानकारी दिएका हुन् ।

उनले शेयर बजारलाई नियमन र सुपरीवेक्षणको लागि बोर्डको क्षमता कमजोर तथा संस्थाभित्र धेरै गुटबन्दी रहेकाले समस्या देखिएको उल्लेख गरे । उनले कर्मचारी अभाव र संस्थाभित्रको गुटबन्दीका समस्याहरुका बाबजुत पनि नियमन गर्ने दायित्वबाट बोर्ड पछाडि नहटेको उल्लेख गरे ।

उनले कर्मचारीको क्षमता बढाउन, प्राविधिक क्षमता बढाउनेमा बोर्डले चासो नदिएको बताए । उनले बोर्ड बजारलाई व्यवस्थि र पारदर्शी कारोबार बनाउनको लागि नियमित रुपमा काम गरिरहेको बताए । उनले धितोपत्र बोर्डले ध्यान नदिँदा कम्पनी ऐनले पब्लिक कम्पनी हुन ३ वर्ष र सेबोनको नियमावलीमा २ वर्ष उल्लेख भएको बताए । उनले लेखा समितिले दिएको पत्रका कारण जलविद्युत कम्पनीको आईपीओ रोकिएको बताए ।

उनले लाभांश दिन नसक्ने कम्पनीको मूल्य किन बढिरहेको छ भन्नेमा आफू पनि अन्योलमा रहेको बताए ।

उनले भने,‘नयाँ सरकार आउने वितिकै पुँजी बजार किन बढ्यो भन्नुकुरा आएका छन् । यसमा अर्थमन्त्रीलाई स्वागत गरेको हुनसक्छ । दुई तिहाईको सरकार बनेको सरकार प्रतिको विश्वास हुनसक्छ । मौद्रिक नीतिले प्रभाव परेको हुनाले लगायत अन्य धेरै कारणले बढेको हुनसक्छ । यही हो भनर अध्ययन गरेका छैनौं । बजारको अन्तराल हेर्दा केही वर्ष बढ्ने र घट्नेकाम भइरहेको छ ।

बजारलाई व्यवस्थित र पारदर्शी कारोबार बनाउने विषयमा सचेत छौँ । धितोपत्र बोर्ड चुप बसेको छैन । हामीले क्षमता अनुसारको काम गरिरहेका छौ । संस्थाभित्र पनि गुटबन्दी जस्तो देखिन्छ । यस्ता खालका समस्याहरु पनि छन् । यस्ता समस्याका बाबजुत पनि नियमन गर्ने दायित्व हो । त्यो संस्थाले निभाई रहेको छ ।

नियमित रुपमा बैठकहरु गरिरहेका छौ । सार्वजनिक लेखा समितिले साधरण शेयर निष्काशन गर्ने कम्पनीले रियल नेटवर्क ९० प्रतिशत भन्दा बढी भएका कम्पनीहरुलाई मात्रै दिनु भनेर निर्देशन दिएको कारणले रोकिएको हो ।’

उनले बजार बढ्नुको कारण यही हो भनेर भन्नसक्ने अवस्था नभएको बताए । उनले बजार केही समयको अन्तरमा बढ्ने र घट्ने गरेको भन्दै नयाँ, बलियो सरकार भएर वा राम्रो मौद्रिक नीति भएर बजार बढेको हुनसक्ने उल्लेख गरे । उनले बोर्डले केही प्राविधिक बिषय बुझ्न परेमा नेप्सेको सहयोग लिनुपर्ने अवस्था रहेको बताए ।

अध्यक्ष बरालले हल्लाको पछि दौडिँदा लगानीकर्ताहरू डुब्ने गरेको बताए । उनले कम्पनीको वित्तीय कारोबार र प्रतिफलमा हुने भएपनि पछिल्लो समय हल्लाले बजार मूल्य निर्धारण भइरहेको बताए ।