काठमाडौं । निजी लगानीमा सञ्चालित रेन्बो डिस्टिरीले प्राथमिक सेयर (आइपिओ) निष्कासन गर्ने भएका छ । लुम्बिनी प्रदेशका भैरहवामा १५ वर्षदेखि सञ्चालनमा रहेको उच्चस्तरिय मदिरा उत्पादक रेन्बोले आधुनिक प्लान्टसहित व्यवसाय विस्तारका लागि थप पुँजी जुटाउन आइपिओ निष्कासन गर्न लागेको हो ।

कम्पनीले यी सबै प्रक्रियाका लागि एलिट क्यापिटल लिमिटेडसँग कर्पोरेट एडभाईजरी सेवा अन्तरगत ‘रोड टु आइपिओ’ योजनासम्बन्धि सम्झौता गरेको छ । सम्झौतामा एलिट क्यापिटलका कार्यकारी अध्यक्ष दिनेश आचार्य र रेन्बो डिस्टिरीका अध्यक्ष मिनराज भुसालले हस्ताक्षर गरेका छन् ।एलिट क्यापिटलले ‘रोड टु आइपिओ’ योजना अन्तरर्गत नवप्रवर्तन (स्टार्टअप) देखि पुराना कम्पनीहरुलाई समेत पव्लिक कम्पनीमा रुपान्तरण, पुँजीवृद्धी र व्यवसाय प्रवद्र्धनमा परामर्श सेवा दिँदै आइरहेको छ ।

रेन्बो डिस्टिलरीले १० करोड रुपैयाँ रहेको चुक्ता पुँजीलाई शतप्रतिशत वृद्धि गरी २० करोड रुपैयाँ पुर्याइ पव्लिक कम्पनीमा रुपान्तरण हुने जनाएको छ । एलिटले रेन्बोलाई चुक्ता पुँजी वृद्धि, व्यवसाय विस्तार, वित्तीय व्यवस्थापन र बजारीकरणका लागि संस्थागत परामर्श सेवा उपलब्ध गराउने भएको छ । यसबाहेक आइपिओ निष्काशन प्रयोजनका लागि बिक्री प्रबन्धक र अण्डरराईटरको व्यवस्थापन पनि एलिट क्यापिटलले नै गर्ने सम्झौतामा उल्लेख छ ।

हाल १० करोड चुक्ता पुँजी रहेको कम्पनीमा नयाँ लगानीकर्ता थपिएसँगै पुँजी बढाइ नयाँ प्लान्टमार्फत उत्पादन शुरु गरिँदैंछ । यसका लागि कम्पनीले आफ्नै जग्गामा नयाँ भवन र प्लान्ट समेत जडान गरिरहेको छ । पुँजी बढेपछि कम्पनीले पव्लिक कम्पनीमा रुपान्तरण भई आइपिओ जारी गर्ने योजना बनाएको रेन्बो डिष्टिलरीका अध्यक्ष भुसालले जानकारी दिए ।

रुपन्देहीको तिलोत्तमा १५ मा आफ्नै भवनमा रहेको कारखानामा यस कम्पनीले ५० यूपि र ७० यूपिका सोफी, स्मुच, इडेन प्रिमियम, पिकनिक, अरेन्ज, पाइस र टकिलालगायत दुई दर्जन ब्राण्डका मदिरा उत्पादन गरिरहेको छ ।

हालसम्म नेपालको सेयर बजारमा हिमालयन डिष्टिलरी लिमिटेड मात्रै मदिराजन्य उद्योग सुचिकृत भएको छ । त्यसैले नाफाजन्य उद्योगको रुपमा रहेको रेन्बो डिस्टिलरीलाई पव्लिक कम्पनी बनाई आइपिओ जारी गर्न लागिएको कम्पनीका सञ्चालक प्रकाश भुसालले जानकारी दिए ।