काठमाडौं । प्रमुख प्रतिपक्ष दल नेकपा (माओवादी केन्द्र) का उपमहासचिव जनार्दन शर्माले जाजरकोट लगायतका जिल्लाहरुमा भूकम्पपछिको पुनर्निर्माणको कामलाई तिब्रता दिनेगरी आवश्यक जनशक्तिको तत्काल व्यवस्था गर्न सरकारसँग माग गरेका छन् । मंगलबार बसेको प्रतिनिधि सभाको आकस्मिक समयमा बोल्दै उनले सो माग गरेका हुन् ।

उपमहासचिव शर्माले पुनःनिर्माणको काममा ढिलाई नगर्न पनि सरकारलाई सचेत गराए । उनले रुकुम पश्चिमस्थित चौरहजारी टार सिंचाई आयोजना तत्काल सुचारु गराउन पनि सरकारको ध्यानाकर्षण गराए ।

धानबालीका लागि अति आवश्यक सो सिंचाई बाढी र पहिराले अवरुद्ध भएकाले त्यसलाई सरकारले तत्काल सुचारु गराउनुपर्ने उपमहासचिव शर्माको भनाई थियो । उनले बाढी र पहिरोले जोखिममा परेका बस्तीलाई सुरक्षित स्थानमा सार्ने काममा पनि विशेष ध्यान दिन सरकारलाई आग्रह गरे ।

उपमहासचिव शर्माले भने, ‘जाजरकोट, रुकुम, सल्यान, डोटी र बझाङमा भूकम्प पुनर्निर्माणका लागि आवश्यक प्राविधिक जनशक्ति सहितको कार्यालयहरुको स्थापना गरियोस । आवश्यक तयारीसहित पुनर्निर्माणलाई छिटो भन्दा छिटो अगाडि बढाउनका लागि सरकारले पहल लेओस भन्ने कुरा म माग गर्न चाहन्छु । त्यसैगरी रुकुम पश्चिमको चौरहजारी टार सिंचाई योजना एक महिनादेखि अवरुद्ध भएको भएको बाढि, पहिरोको कारणले ।

त्यसलाई सुचारु गर्न स्थानीय सरकारको प्रयास गर्यो तर सम्भव भएन । र त्यसबाट वडा नम्बर १, २, ३, ४ , ६, ७ र १० मा किसानहरुले लगाएको धान पानी कम हुने बित्तिकै त्यहाँ सुख्खा हुने अवस्था सृजना भएको छ । त्यो सिचाई योजना सुचारु गर्नका लागि तत्काल सरकारले पहल लेओस् भन्ने म राख्न चाहन्छु । बस्ती सार्नुपर्ने र केहीलाई सार्नुपर्ने अप्ठयारो अवस्था भएकाले गृह मन्त्रालयसँग पनि गएर हामीले माग गरेका छौं । तर पनि काम अघि बढिरहेका छैन । सरकारले यस्ता ठूलो क्षति हुने सम्भावना भएका वस्तीमा मानिसलाई सुरक्षित स्थानमा बस्ने ब्यवस्था पनि मिलाउनु पर्छ ।’

उपमहासचिव शर्माले सरकारले बाढी, पहिरोले जोखिममा पारेका बस्तीका मानिसहरुको सुरक्षित स्थानमा सार्ने काममा ढिलाई गरेकोमा असन्तुष्टि समेत व्यक्त गरे ।